Вольбы в Сербії

Остатня неділя была волевна. А не лем на Україні. В неділю проходили і вольбы до тзв. Націоналного совіту в Сербії. Своїх новых депутатів выберали і Русины.

Новых депутатів до Націоналного совіту могло волити 8270 Русинів, котры ся дали записати до окремого списку народностных воличів. В неділю голосовало 3317 із них, што значіть, же вольбы мали міджі Русинами 40 проценту участь. Русины волили 19 депутатів і могли собі выберати із 7-ох кандідачных списків. Вшыткы кандідачны спискы здобыли мандаты.

Список під назвов „Вєдно за Руснацох – Славко Рац“, котрый творили представителі Демократічной партії і прихылниці Союзу Русинів-Українців, здобыв у вольбах 5 мандатів і став ся найуспішнішым кандідачным списком. Такой по нім слідовав кандідачный список з назвов „Руска лиґа – Олена Папуґа“, котрого кандідати представлюють Соціалнодемократічну ліґу Войводины і співпрацують з русиньсков орґанізаційов Руска матка, значіть суть ту заступцове русиньсккого напряму. Тот список здобыв 4 мандаты. На третім місці скінчіла кандідатура „За Руски Керестур – Желько Ковач“, котра здобыла 3 мандаты. Суть то кандідаты Демократічной партії, проукраїньскы орьєнтованы. Три маднаты здобыла і кандідатура під назвов „Я Руснак“, тоты мандаты можеме раховати за прорусиньскы мандаты. З двома мандатами скінчіла „Руска инициятива – Микола Шанта“, котра є таксамо проукраїньскы орьєнтована. Представителі форуму молодых Руской маткы, котры кандідовали під назвов „Млади за будучносц“ здобыли єден мандат єднако як список „Руска младеж“. В новім націоналнім совоті так буде 19 членів, з котрых 10 мандатів буде мати проукраїнске крыло, 8 мандатів прорусиньске і 1 мандат є на тот час невыпрофілованый.

Націоналный совіт є найвысша форма народностной самосправы в Сербії. Фунґує од 2002 року.