Выголосили першых лавреатів Премії імени Мигаля Града

В пятніцю 10-го новембра 2023-го року Русинськоє літературно-культурноє общество, яке діє на Підкарпатю, выголосило на своїм офіціалнім сайті на сіті Facebook першых лавреатів Премії імени Мигаля Града – за розвой і пропаґованя русиньской културы.

Номінації были в двох областях, конкретно в катеґорії література, і катеґорії култура. За літературу лавреатом стала Тетяна Рацин, за културу Микола Поцко.

Премія імени Мигаля Града

Русинськоє літературно-культурноє общество іщі в септембрі того року оголосило, же основать дану премію, котра несе мено по русиньскім поетови і першім пердседови Союза русиньскых писателів Закарпатя, на котрого діятельность теперішнє общетво надвязує.

Як втогды основателі інформовали, премія має каждый рік вручати ся русиньскым умелцям Підкарпатя – літераторам, малярям, фотоґрафам, скулпторам і музикантам, за їх вклад до розвоя і пропаґації русиньской културы і літературы.

Премію вырішыли вручати все 10-го новембра, коли припоминаме собі день народжіня Михаіла Града.

Першы лавреаты

Як вше было спомянуто, першыма лавреатами стали Тетяна Рацин і Микола Поцко. „Поетка Тетяна Рацин, хоць появила ся в русиньскій літературі недавно, но свойов актівностьов, стараннов роботов над словом, заслужыла на высоку похвалу,“ пише орґанізатор премії.

Рацин актівно публікує в русиньскых літературных алманахах, котры выходять на Підкарпатю, а так само в журналі Отцюзнина.

Микола Поцко є знамый русиньскый умелецькый фотоґраф. Премію здобыв за многорічны труды і фоторепортажі, вдяка котрым пропаґують ся різны аспекты русиньской културы. „Його обєктів зафіксовав чісленны културны події, учінивши їх достойныма про шырокый круг людей. Його роботы всокотять память на красны події про будучі поколіня.“

Михаіл Град

Михаіл Град (рр. 1950 – 2021), по котрім є премія незвана, быв русиньскый писатель, поет і публіціста, довгорічный голова Союзу русиньскых писателів Закарпатя.

Написав книжкы на російскім, україньскім і русиньскім языку, в котрых є історія, поезія і співанкы Русинів. Меджі нима Сердце солдата, Чари земні, Закувала Зозулиця, Сини Марамороша, Марамороські наспіви, Русинські писателі Закарпатя, Русинські співанкы Марамороша, Талановита Тячівщина, Проміння серця, Тячів – місто моє.