Выбрано тогорічных лавреатів нагороды ім. Р. Райнфуса

Капітула Нагороды Малопольского Воєвідства ім. Романа Райнфуса рішыла, хто того рока отримат премію. Рішыня тото потвердила постанова Заряду Малопольского Воєвідства. Серед тогорічных лавреатів нашол ся і соспільний лемківскій діяч – Павел Стефановскій з Білянкы. Торжественне вручыня нагороды пройде в найблизшу суботу, 23. вересня/септембра, в Шымбарку.

Роман Райнфус был выдатным етноґрафом і дослідником народного мистецтва, якій звязаний был свойом науковом діяльністю з карпатскыма ґуралями, предовшыткым з Лемками. Нагороду його імени передає ся адже за особливы успіхы в обшыри захованя локальной культуровой достоменности в Малопольщы. Выріжніня признає ся што рока од 2012, а ініциятором і орґанізатором того же конкурсу єст Малопольскє Воєвідство. 

Того рока выбрано трьох лaвреатів. Першу нагороду отримат сандеччанка Михалина Войтас – знавчыня народной культуры, долголітня кєрівничка і хореоґрафка Ансамблю Пісні і Танця «Ляхы». Другу премію отримат лемківскій діяч з великым соспільным доробком – Павел Стефановскій. Третю нагороду – Дариюш Жезьнік, кєрівник Ансамблю Долина Попраду з Певничной.

Павел Стефановскій заслужыл ся для Лемків м.ін. дякы покликаню Громадянского Кругу Лемків в Польщы «Господар» (пак політичной партиі – Русиньскій Демократичний Круг Лемків «Господар»), цілю якого было боронити державны права выселеных Лемків. Основал і приватний музей, в котрым находят ся соткы артефактів та нарядя і лемківскє облечыня. Долгы рокы документувал лемківску культуру, зберал стары пісні і танці. Был спілініциятором основаня вельох ансамблів. Є він і єдным з найвызначнійшых русиньскых сучасных писменників і поетів.

В попередніх роках нагороду ім. Романа Райнфуса отримали і Петро Трохановскій (2013 р.) – выріжніня за активну соспільно-культуральну діяльніст для охороны та шыриня нематерияльной спадковины русиньской культуры, та Антоні Крог (2014 р.) – головна нагорода в катеґориі: подія пошырююча знаня про вартіст і значыня локальной культуровой спадковины.