Выіздове малюваня яєц!

Од парунадцетьох років Стоваришыня Руска Бурса, все на Квітну Неділю, орґанізує спільны варштаты малюваня яєц. Так буде і того рока.

Зас вшыткы охочы будут мати нагоду, жебы зыйти ся перед самым Великодньом і в радістний час праздника Входу Ісуса Христа до Єрусалиму зачати рыхтуваня до найбільшого церковного свята в році. Очывидні, крашыня писанок до кошычка, то лем част тых рыхтувань, але традиция малюваня яєц все была і єст барз жывом серед Лемків. Што єст незмінным, кєд іде о бурсяны варштаты, то спосіб прикрашаня яєчок – плеканий і барз популярний серед Лемків – через батканя писанок пчолім воском, наношеным шкляном іголком. Незмінным єст тіж факт, же каждого рока приходит ґрупа осіб, серед котрых сут так постійны варштатовичы, як і дебютанты. Дальше – все присутний єст што найменьше єден, часом двох, інструктор, якій єст тіж мастером того артистичного кумшту (позерайте долов на знимкы приміровых писанок авторства єдного з інструкторів – Андрия Малецкого). Все сут для варштатовичів зрыхтуваны наварены яйця до малюваня, фарблений воск (рокы практикы вказали, же ани американьскы восковы кредкы не фарблят воску так добрі, як паста до черевіків) та слоічкы з плыном до кольоруваня готовых писанок.

Вшытко буде выглядало ідентичні, а кєд іде о найблизшы варштаты, з том ріжницьом, же інчым буде місце стрічы. Вынятково того рока не буде то будинок Руской Бурсы, а сельска світлиця в Ґладышові. З таком думком выступил шолтыс Ґладышова, будучий тіж членом Стоваришыня Руска Бурса – Мирослав Пелехач. Запрошыня было охочо приняте (радо піднимаме такы добры ідеі), в результаті чого заявляме – найблизшы варштаты малюваня яєц проходити будут 9. квтіня/апріля в сельскій свiтлици в Ґладышові о 14.00 год.

Завдякы тым бурсяным стрічам, знаня батканя яєц іщы долго не буде находило ся серед загыбаючых прекрасных традиций лемківской меншыны.