Вышла книжка о Юрійови Цимборови

Як інформовала Окресна орґанізація Русиньской оброды у Свіднику, із пера русиньского актівісты і етноґрафа Яна Калиняка вышла нова книжка під назвов Юрко Цимбора.

Книжка, котра вышла із підпоров Уряду влады Словацькой републікы в рамках проґраму Култура народностных меншын 2016, буде святочно презентована 27-го септембра 2016-го року в просторах Піддукляньской бібліотекы у Свіднику. Подія зачінать о 16.00 год.

Юрій Цимбора

Юрій Цимбора народив ся 6-го юнія 1919-ро року у Свіднику, втогдышня Чехословакія. Быв хормайстром, хореоґрафом і фолклорістом серед Русинів выходной Словакії.

Цимбора закінчів Ґрекокатолицьку руську учітельску семінарію в Пряшові і на кінцю 1930-ых рр. і цілы 1940-ты рокы пропаґовав балалайкову музику міджі русиньскыма жытелями і міджі русиньскыма штудентами на пряшівскій Руській ґрекокатолиьцкій ґімназії.

По закінчіню штудія хорового співу і діріґованя в Братіславі вступив у 1953-ім році до втогдышнього Піддукляньского україньского народного ансамблю (ПУНА – ПУЛС). В ансамблі робив поступно хормайстра, драматурґа, умелецького директора і зробив про нього много танечных хореоґрафій, музичных творів, котры ся стали репертоаром ансамблю.

Цимбора мав досконалы знаня містного русиньского фолклору. Зробив дакілько збірників народных співанок, в тім чіслі і „Українські народні пісні Східної Словаччини“ (том ІІ, 1963 р.) ці „Заспіваймо собі двома голосами“ (1974 р.).

Юрій Цимбора умер 1-го октобра 1989-го року в Пряшові.  

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА