Вышлий книжку до Команчы!

Того рока зас рушат выняткова акция спертя Основной Школы в Команчы. Хто лем може і мат охоту, може обдарувати команецкы діти і молодіж книжком на конец шкільного рока.

Вшытко прото, жебы вказати, же не треба жыти в великій аґломерациі (де на каждым кроці єст під достатком ріжных додатковых едукацийно-культуральных інституций), жебы мочы ся розвивати, пошырювати своі заінтересуваня і знаня, а завдякы тому, мати можніст достати ся на вымрияны студиі, або до інчой школы. А тіж, жебы вказати, же інтернет, до котрого діти не зо свойой вины, а з огляду на планну інфраструктуру того місця на мапі Польщы, не мают свобідного і легкого доступу, не єст єдиным джерелом інформаций і шансом на обытя зо світом.

Кєд хочете прилучыти ся до той великодушной акциі, купте даяку книжку, котра може заінспірувати діти, або молодіж (основна школа і ґімназия) і вышлийте єй на адрес:

Zespół Szkół w Komańczy
Komańcza 249
38-543 Komańcza

або замовте даку книжку одраз на адрес школы. Кажда книжка буде опечатана лоґом акциі – Чытаня Возносит, а листа осіб, котры подарували книжкы, найде ся на сайті школы. Кєд назберат ся більше книжок, якы треба жебы обдарувати кажду дітину в школі, то приміром першой едициі, коли то до школы присланых было аж 2264 книжок, наддаток трафит до шкільной бібліотекы і до інчых, сусідскых шкіл.

Акция ведена єст од 2010 рока з ініциятывы любителя Низкого Бескіду і Бєщадів Дариюша Подбереского (редактора радия Ґданьск) та дослідника, працівника Інституту Палеобіолоґіі Польской Академіі Наук Блажея Блажеєвского, якій выводит ся зо сусіднього села Щавне і часто вертат в родинны стороны, орґанізуючы для діти варштаты і вказуючы дітям, же, завдякы науці, мож вельо осягнути.

фото: архів школы в Команчы