Выстава пн. «Ікона» в Ґорлицях

5. січня т.р. в Польско-Словацкым Домі ім. Д. Юрковича в Ґорлицях буде проходил вернісаж выставы пн. Ікона авторства Інґы Марчыньской. На выставі будут запрезентуваты образы і іконы артисткы.

Інґа Марчыньска єст авторком вельох індивідуальных і колективных выстав м.ін. в Саноку, Єдлічу, Корчыні, Беску, Команчы ци Яслі. Єст лавреатком ріжных конкурсів і одзначынь, достала выріжніня напр. на VII Бієнале Народной і Непрофесийной Штукы в Яслискым Домі Культуры в 2016 р., а в 2015 р. признано єй почесне званя Заслужений для Культуры Яслиского Повіту. Мешкат в Колачыцях, де веде працовню ікон і образів. Діє в Фундациі АнтиСхематы 2 і Стоваришыню Бескід Зєльони. Єст заступцьом ведучого Союзу Артистів Плястиків Польщы Одділіня Ряшів. В рамках вольонтерской роботы орґранізує плястичны варштаты для діти та інвалідів, бере участ в благодійных авкциях і пленерах. Єст заанґажувана в опіку над старыма жыдівскыма цмонтерями. Іконы єй авторства находят ся в приватных колекциях м.ін. в Швециі, Анґлиі, ЗША, Німцьох ци Італиі. Як сама бесідує, джерелом творіня і дорогом єй вандрівкы через жытя єст гляданя внутрішнього спокою, скупліня, молитва, радіст з бытя матірю і узнаня для іконоґрафічного кумшту. Більше про І. Марчыньску можете найти на сайті артисткы, там тіж найдете обшырны ґалериі ікон і образів, якы вышли спід єй рукы.

Выстава буде мож видіти в днях од 5. до 27. січня/януара тр. в Польско-Словацкым Домі ім. Д. Юрковича в Ґорлицях.

Фот. горі: фб-профіль працовні І. Марчыньской.