Выступ Терочкы упамятняючий 70. річницю Акциі Вісла

Дуже діяло ся при креницкій православній парохіі в пятницю, 28. липця/юлия. Того дня креницкы парохіяне, як што рік, празднували памят покровителя свойой церкви, св. Владиміра Великого. Найперше одслужено Службу Божу, в якій участвовали і чысленны гості. На конец Божественной Літурґіі владыка Паісий вручыл пану Петрови Трохановскому почестну грамоту з нагоды 70. річниці його уродин. По літурґіі вшыткы присутны были запрошены на полуденок, але не лем.

А не лем прото, же того рока для гости была прирыхтувана іщы артистична част. Молодіжний ансамбль Руской Бурсы в Ґорлицях «Терочка» вказал ся на креницкым кєрмешу, але з кус іншым як все репертуаром. З нагоды 70. річниці Акциі Вісла ведучий ансамблю, Андрий Трохановскій, рішыл запрезентувати проґрам звязаний як раз з том темом. Молодіж чытала выбраны урывкы споминів старшых люди, котры в 1947 році были брутальні выгнаны зо своіх рідных земель. В часі чытаня капеля тихо прыгрывала настройовы мельодиі. Презентация споминів переплітувана была патріотичныма піснями, нп. «Лемковино, Лемковино!» ци «Тяжко жыти на чужыні». Выступ ввюл присутных в атмосферу задуманя, дозволил вернути думками до тамтых часів. На конец молодіж уж без акомпаніяменту заспівала пісню «Горы нашы», а пак Андрий Трохановскій подякувал особам, котры згодили ся оповісти свою-нашу долю: п. Параскєві Бреян, п. Мариі Цюрик, п. Анні Косовскій, п. Мариі Гончарик, п. Анні Горбаль, п. Мариі Ґрыч, п. Меланіі Клинковскій, п. Петрови Бубернакови.

Терочка перший раз запрезентувала такій репертуар. Перший, але не остатній. Уж неодолга, бо 4. серпня/авґуста, на Лемківскій Ватрі на Чужыні ансамбль зас выступит з такым проґрамом. Зато, хто лем має можливіст і охоту, запрашаме!