Голосник

Выремонтуют дальшы капличкы

Поставлены при дорогах, туристичных путях захоплюют так само місцевых, як і тых, котры приізджают до Малопольщы – то капличкы, котры міцно вписали ся в краєвид полудня. Того рока дальшым капличкам верне бывшый блеск, а то завдякы підпорі самоуряду воєвідства – в рамках проґраму Малопольскы Капличкы 2020. Того рока сума грошы на тоту ціль то аж 750 тис. зл. Внескы мож складати іщы лем до пятниці, 13. марця.

«Капличкы, котры мож найти во вшыткых закутинах Малопольщы, сут важным елементом культурового краєвиду нашого реґіону» – підкрислят маршалок Вітольд Козловскій. «Сут не лем свідоцтвом віры, але і захоплюючыма примірами народной штукы. Протягом років возношены были для упамятніня важных історичных подій ци персон. Тым самым єднают минуле з теперішнім, зато не уявлям сой, жебы сме того рока мали забыти о переданю середків з буджету воєвідства на реновацию тых вынятковых обєктів» – продолжат.

Конкурс напрявленый є на єдиниці самоуряду з обшыри малопольского воєвідства. Капличкы, котры находят ся на приватных ділянках, тіж можут быти выремонтуваны – треба, жебы властитель нерухомости навязал спілпрацу з одповідньом му ґміном або повітом. Обєкты, котры будут ремонтуваны, не мусят быти в реґістрі памятників, ци то малопольского воєвідства, ци то ґміны, але повинны характеризувати ся артистичныма і історичныма приметами.

Єден внескодавця може зложыти два внескы, каждый для окремой капличкы. Максимальна квота дофінансуваня то 25 тис. зл, але не більше як 60% коштів реалізациі цілости робіт. Дотепер завдякы приділеным фінансуваням в квоті 4 млн зл повело ся выремонтувати більше як 470 капличок.

 

 

 

 

 

 

 

Фот. Діґітальный Архів Тур Тондос

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі