Выріжніня для о. Романа Дубеца

Схваліньом Заряду Малопольского Воєвідства з 22. грудня/децембра 2020 р. парох ґорлицкой православной парохіі св. Тройці о. митрат др Роман Дубец нашол ся серед выріжненых в рамках Нагороды Малопольского Воєвідства ім. Марияна Корнецкого за 2020 рік. Одзначыня признано за выдатны осягніня в обшыри охороны і опікы над памятниками деревяной архітектуры Малопольщы.

На основі рекомендаций Kaпітулы Нагороды, яка оцінила зголошыня до Нагороды, Заряд Малопольского Воєвідства рішыл признати головну нагороду ім. М. Корнецкого Ельжбєті Ґрабось. Признано тіж три выріжніня: Mихалови Вінярскому, о. митратови Романови Дубецови та римокатолицкій парохіі в Пшыдоници.

В поясніню кандидатуры Капітула Нагороды подала, што о. Дубец веде шыроку діяльніст звязану з консерваторском опіком над памятниками деревяной архітектуры та єст активным аніматором культуры, якій популяризує ідею ожывляня деревяных храмів через орґанізуваня в іх середині артистичных подій.

Отец митрат Роман Дубец єст Єпархіяльным Консерватором Памятників Перемышльско-Ґорлицкой Єпархіі. Од років опікує ся памятниковыма храмами в Перегримці і Розділю. З особливым заінтересуваньом веде роботы для захованя перед знищыньом кіриличных церковных стародруків. Окрем того єст ініциятором і орґанізатором циклю концертів пн. «Спів з іконом на фоні» та «Бортняньского поворот до Бортного», котрых цілю є шырити в реґіоні красу і розмаітіст церковного співу.

Головну нагороду Заряд признал Ельжбєті Ґрабось, консерваторці творів штукы, думкодавчыни і творчыни Загороды Аполонія в місцевости Закжів, яка складат ся з памятниковой деревяной забудовы з кінця ХІХ і початку ХХ ст. По консервациі, Загорода є місцьом едукацийной діяльности, популяризуючой знаня о деревяній архітектурі.

Нагорода ім. Марияна Корнецкого была схвалена, жебы звекшыти заінтересуваня охороном і опіком над памятниками деревяной архітектурі в реґіоні малопольского воєвідства. Має мотивувати креувати і вводити проґрамы охороны памятників та захованя іх в натуральным культуровым середовиску і краєвиді, та жебы творити хосенны условія до іх документуваня і досліджаня. Серед дотеперішніх лавреатів нагороды нашли ся м.ін. о. Володислав Канюк, о. Мирослав Цідило, o. Григорий Назар, о. Мєчыслав Чекай ци др Барбара Тондос.