Як інформовав Юрій Шиповіч, 21-го октобра 2021-го року в Центрі култур народностных меншын Закарпатя в Ужгороді одбыла ся презентація книгы з назвов Унгвар – Ужгород. Муй рудный варош.
Автором публікації є знамый русиньскый історік і краєзнатель Людвіг Філіп, котрый є і честным председом Ужгородьского културно-освітнього общества імени Александра Духновіча. Книга в юні того року вышла і в україньскій верзії. Як втогды автор повів про Tv21 Унгвар, на книжці робив ціле своє жытя.
„Старав єм ся писати історію обєктівно. 47 років я робив у краєзнавчім музею як ведучій одділіня, як науковый працовник, і мав єм прекрасну базу, было з чого взяти – документы, фотоґрафії,“ повів втогды Філіп.
На презентації русиньской верзії автор повів о тяжкій пути, котров перешла його теперь публікована дітина. Так само спомянув, же публікація бы не дішла до чітеталя, кебы не было підпоры Бориса Жулканича з Ужгородьской націоналной універзіты. Лем його участь помогла книзі увидіти світ.
Модератором презентації быв Євген Жупан, голова Народной рады Русинів Закарпатя. На події брали участь і далшы русиньскы актівісты краю, меджі котрыма быв голова Закарпатьского областного общества імени Александра Духновіча Юрій Продан, голова Русиньского културолоґічного клубу Юрій Шиповіч, голова Ужгородьского културно-освітнього общества імени Александра Духновіча Михаіл Белень і далшы.
Фото: Віра Кобулей.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
Коментарі