Вышла книга присвячена сторічніці православного монастыря в Ладомировій

В тых днях вышла в словацькім языку нова публікація під назвов Маяк православя. 100 років од выникнутя ладомирьского монастыря як продовжователя православного монашества на Словакії (рр. 1923 – 2023), котрой автором є протоєрей Петро Сорока, православный духовный в Осаднім.

Книжка є присвячена православному Монастырю пребодобного Іова Почаївского, котрый быв важным центром при обнові православя на теріторії выходной Словакії, хоць його існованя не тримало довго.

Монастырь в Ладомировій

Монастырь преподобного Іова Почаївского в Ладомировій, русиньскім селі Свідницького окресу, офіціално існовав од 1923-го до 1946-го року. Належав під Мукачовско-пряшівску єпархію Сербской православной церькви, но реално го вів архімандріта Віталій Максименко, котрый належав під Російску православну церьков в загранічу. Тота выникла у 1920-ых роках, была властно екзіловов церьквов по політічных змінах в Росії.

В монастырю жыло много пізнішых славных духовных і монахів Російской православной церькви в загранічу. Монастырь мав властну друкарню, быв познатый вдяка своїй великій роботі у выдаваню і дістрібуції реліґійной літературы.

Братія монастыря мала велику роль при пошырьованю православія на теріторії днешньой Словакії.

Як послушник до монастыря в Ладомировій наступив і Василь Шкурла, родак з того села, котрый пак став владыком Лавром, митрополітом Выходной Америкы і Ню Йорку Російской православной церькви в загрнічу.

1-го авґуста 1944-го року опустили монастырь майже вшыткы монахы вєдно із іґуменом Серафимом, і втекли перед поступаючов Червенов армійов. В монастырю зістали лем трьоми монахы, і уж 15-го новембра того самого року пришли до Ладомировой совітьскы вояци. Монастырь быв зниченый бомбардованьом а зістала лем Церьков святого Михаіла Архістратига. De iure мoнастырь заникнув у 1946-ім році.

Велике місійне діло і значіня монашества

Як ся пише в анотації ку новій публікації, монастырь і друкарня в Ладомировій зробили велике місійне діло про обновліня православя на теріторії днешньой Словакії в меджівойновім періоді.

„Новинкы і книжкы были посыланы до цілого світа, і доднесь суть іншпіраційов про выдавану богослужебну і духовну літературу,“ пише протоєрей Петро Сорока. В книжці занимать ся детайлнов історійов монастыря, обстсавинами выникнутя, духовным і соціалным впливом на тутешніх жытелів, але і описом выдаваной літературы ці особностями, котры в монастырю діяли. В публікації суть і добовы знимкым а образкы, наприклад і з окремых книжок.

„Тота книга бісідує о значіню монашества в Православній церькви, заникнутых православных монастырях у нас, як і о споминанім монастырю в Ладомировій, котрый став продовжовательом їх традіції на теріторії выходной Словакії,“ пише Сорока з тым, же книга почала выникати уж майже перед 25-ма роками збераньом інформацій і літературы од втогды іщі жыючіх людей, котры памятали собі монастырь.

„Цільом моїх намаг є ожывити історіяю і звернути увагу на літературу, котров монахы учіли наш народ православю,“ пише автор, і акцентує, же собі треба усвідомити, же якраз монахы з монастыря в Ладомировій засіяли насіня місії, з котрого пак выросла і Православна богословска факулта в Пряшові, але і велика часть містной Православной церькви.

Ку сторічніці конференція і в Римі

З нагоды юбілею выникнутя Монастыря преподобного Іова Почаївского в Ладомировій одбудуть ся бісіды скапчаны з выставов о ладомирьскім монастырю під назвов Од Ладомировой до Джорданвіллу. Якраз до Святотройцького монастыря в Джорданвіллі, в Споєных штатах Америкы, одышли монахы з Ладомировой.

Бісіды з протодіаконом Анрейом Псарєвом, професором Святоройцькой духовной семінарії в Джорданвіллі, одбудуть ся 15-го децембра 2023-го року о 14.00 год. в Авлі Православной богословской факулты Пряшівской універзіты в Пряшові, і 17-го децембра о 15.00 год. в просторах каштеля в Снині.

Ку вызначному юбілею притововив академічну конференцію з назвов 100 років ладомирьского монастыря і Словацькый історічный інштітут в Римі. Конференція одбуде ся 11-го децембра, і свої рефераты на ній будуть мати Даніел Черный, шеф Словацького історічного інштітуту в Римі, Петро Сорока, Андрей Псарєв і Даніел Ґаладза із Папского восточного інштітуту в Римі.

Книга Маяк православя. 100 років од вынилнутя ладомирьского монастыря як продовжователя православного монашества на Словакії (рр. 1923 – 2023) вышла вдяка фінанчній підпорі з Фонду на підпору културы народностных меншын і мож єй купити ту.