Вышла нова «Бесіда» з календарьом на 2022 рік – послідня в тым році

В тот осінньо-зимовый час до нашых рук трафлят остатнє чысло часопису Стоваришыня Лемків – «Бесіда», ч. 6 (183) за місяці листопад/груден 2021 р. Всередині найдеме «Календар Бесіды на 2022 рік», якій конечно мусите мати в своіх хыжах.

Посліднє выданя приносит нам жменю реляций з подій, якы проходили літом і вчасном осіню в нашым русиньскым світі. А діяло ся вельо, од ювілею Стоваришыня «Руска Бурса» в Ґорлицях через Світовый Конґрес Русинів, якій проходил в нас на Лемковині, по Лемківску Творчу Осін.

В посліднім выданю прочытаме м.ін. статі:

• Петро Трохановскій, Одновлена Руска Бурса діє уж 30 років. Радийо ЛЕМ.фм шле до ефіру свій голос 10 років;
• Моніка Тылявска, 20-літя основаня лемківской філолоґіі; 
• Андрий Ковальскій, Євген Габура серед Личности Рока Польщы;
• Андрий Ковальскій, Ластівочка дале нагороджувана;
• Петро Медвідь, В Креници одбыл ся XVI Світовый Конґрес Русинів;
• Петро Трохановскій, XXIX Лемківска Творча Осін; 
• Петро Медвідь, Першым лавреатом преміі Pro Arte Ruthenorum остал Володимир Микита; 
• Петро Трохановскій, Великій забытый – до 200. річниці народжыня Йосифа Сембратовича;
• Юрий – Кальман Жаткович, Народный Календар (5). 

Окрем спомненых горі дописів, очы чытача тішыт жменя вісти в части «Новины, не новины – не лем з Лемковины». Найдеме в часописі – як все – Амрозове казаня, лемківскы фразеолоґізмы ци анеґдоткы од Максима і Клима. На остатній стороні нашли ся подякуваня для осіб, якы жертвували на статутову діяльніст Стоваришыня Лемків. Почытаме тіж выімкы з польскых і словацкых ґазет, якы дотулялют тем близкых нашій справі.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст в четвергы в год. 10.00-15.00, в суботы в год. 10.00-13.00 або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.