Нова «Бесіда» реляцийонує о упамятнінях Акциі Вісла

В передден креницкого Бієнале явил ся дальшый номер часопису Стоваришыня Лемків – «Бесіда», ч. 3 (186) за місяці май/червец 2022 р.

Сесе выданя приносит нам в більшости реляциі з упамятнінь 75. річниці Акциі Вісла, якы проходили 30. квітня/апріля в Явожні, Біличній, Устю Рускым і Ґорлицях.

В посліднім выданю прочытаме м.ін. статі:

• Наталия Малецка-Новак, Доцінили Лемківску Едукацийну Загороду в Ґладышові!;
• Петро Медвідь, Лемковина в Пряшові;
• Севериян Косовскій, Петро Мурянка по шлезскы…;
• Андрий Копча, Пані Ольгі Переґрим сполнило ся 91 років;
• Петро Трохановскій, Великоднім Христос Воскресе прозвучало одзначаня 75. річниці Акциі Вісла;
• Наталия Малецка-Новак, Не барз ся мі хоче;
• Петро Трохановскій, Минуло 100 років од народжыня Івана Мациньского;
• Петро Трохановскій, Минуло 100 років од смерти Теофіля Качмарчыка. 

Окрем выміненых дописів, в посліднім выданю прочытаме тіж одозву Михала Гайтка до Ясюнчан і вшыткых люди, якых рід выходит з Ясюнкы. Автор одозвы просит о контакт каждого, хто хоче спомочы выданя книжкы про рідне село. Михал Гайтко по прешло 30 роках одзыскал вітцівску ґаздівку і тепер хоче гын поставити пропамятный крест, під котрым увічнены останут ясюнчаньскы роды.

В ґазеті нашли ся тіж передрукы з польской і словацкой пресы, якы м.ін. односят ся до річниці выселіня. На жаль, польска преса найчастійше тендeнцийно підходит до темы Акциі Вісла, поминяючы факт выселінь і громадян лемківской нацийональности.

Почытати годны сте спомины Гавриіла Костельника про выгнаня з Білцаревы, як і оповіданя Семана Мадзеляна пн. «Великден». Не бракло і пару вершів, як і Амрозового казаня.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 09.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.