Вышов новый зборник Studium Carpatho-Ruthenorum 2024

В тых днях дістала ся нам під рукы нова публікація з Выдавательства Пряшівской універзіты (Vydavateľstvo Prešovskej univerzity). Інштітут русиньского языка і културы Пряшівской універзіты выдав науковый зборник Studium Carpatho-Ruthenorum 2024.

То вже 16-ый річник штудій з карпаторусиністікы. Головнoв едіторков і одповіднов редакторков зборника є Кветослава Копорова, робітничка русиньского інштітуту в Пряшові.

Зборник традічно в попередніх роках обсяговав тексты рефератів, якы одзвучали в данім році в рамках ціклу семінарів карпаторусиністікы, котры інштітут орґанізує. То довгорічна актівность нашой універзітной інштітуції. Зборник векшынов быв доповненый і о даякы далшы научны статі, штудії.

Тот рік є зобрник дакус вынятковым. Інштітут русиньского языка і културы в минувшім році зорґанізовав лем єден семінар карпаторусиністікы, і так векшыну статей творять авторы, котры не выступали з даным мартеріалом в рамках семінарів.

Єдинов выступаючов на семінарі карпаторусиністікы в минувшім році была докторандка нашого інштітуту Домініка Новотна, котра обробила тему під назвов Ку ґенезі еміґрантьской літературы карпатьскых Русиьнів в США. Од братств і обществ к літературным творам.

Зборник обсягує сім статей, причім ся в нім чітателям научного часопису Studium Carpatho-Ruthenorum представить веце дебутантів.

Меджі них належыть Давід Франта із Западочеськой універзіты в Пылзні, якый занимать ся у своїм матеріалі темов рутеністічного діла Антоніна Гартла головно в контексті звязів на Владислава Ванчуру. З той самой універзіты є і Анастасія Франта, котра обробила тему заникнутя і вокалізації єрів в русиньскім языку на матеріалі найстаршых памяток Карпатьской Руси.

О асімілації русиньского населіня на выходній Словакії в другій половині XX. столітя на прикладі села Баньске пише далшый дебутант в зборнику – Тімофей Федор, якый є етноґрафом Словацького народного музея – Музея русиньской културы в Пряшові.

В Studium Carpatho-Ruthenorum 2024 далше найдеме статі Кветославы Копоровой, Анны Плішковой ці Михала Павліча, котры діють на Інштітуті русиньского языка і културы ПУ в Пряшові.