Выстава трьох ікон Новосільского в Супрашли

Од віртуальной вандрівкы 16. мая тр. в Музею Ікон в Супрашли, котре єст одділіньом Підляшского Музею в Білымстоку, зачала ся часова выстава трьох ікон авторства Юрия Новосільского, што походят зо збіркы Музею Католицкого Університету в Люблині.

Іконы з КЛУ

На выставі представлены сут три спосеред штырьох ікон авторства Новосільского, котры находят в збірці Католицкого Університету в Люблині. Іконы походят з початкового періоду творчости артисты. Перша з них то ікона Христа Пантократора, котра была написана близко 1958 р. Друга то ікона Богородиці з 1961 р., а остатня з них то ікона св. Апостола Павла, котра была написана в 1962 р.

Четверта з ікон, котра буде єдном з головных тем наступной выставы (в задумі єй вернісаж має быти в серпни/авґусті тр.), то представліня Преображыня Господнього з 1957 р.

Ікона з іконы

Через близко шістдесят років думано, што Музей Католицкого Універсистету в Люблині має в своій колекциі лем три іконы Юрия Новосільского.

Вчас консерваторскых прац, котры были проведены в 2017 р., принагідні з надходячым ювілейом, 100. річницьом основаня університету, музейны збіркы были тымчасово переданы до Люблиньского Музею. Товды выданы іконы были підданы старанній консервациі. Заінтересуваня притягла предовшыткым ікона Христа Пантократора, а точнійше представлене на ній лице Ісуса. За згодом КЛУ знято ікону Пантократора з малярскых кросен. Як ся товды вказало, під ньом находила ся друга ікона – св. Апостола Павла. Обі іконы остали старанно захованы. Од тамтой поры університетскій музей може гордити ся четвертом іконом, яка вышла спід рукы Новосільского.

Выставу трьох ікон Новосільского мож обзерати в супрашльскых музейных просторах до 28. червця/юнія тр.