Як можу помочы Украіні? #помічUA / ч. 2

Тырват реґулярна война на Украіні. Хоц аґресор Путін называт єй «мілітарном операцийом», то нихто не мат ниякых сомнівів, што є то несправедлива і безсенсовна война. Война проти цілому демократичному світови. Атак на свободу і демокрацию.

Уж тепер є то велика траґедия. Не лем для Украіны, але тіж для Европы, цілого світа. В тій войні сут уж жертвы, вбиты і ранены. Не лем жолніры, тіж цивільны особы. Невинуваты люде. Памятайме, же в тым особливым і тяжкым часі рахує ся каждый ґест, меншый або векшый, солідарности з Украіном.

Хочеме дати Вам можливіст допомочы – тым, котры в тым моменті найбарже потрібуют помочы, і зобрати в єдно місце (буде то серия дописів з гаштаґом #помічUA) провірены способы, як підперти Украіну гев і тепер.

ФІНАНСОВА ПІДПОРА:

Fundacja Ocalenie – помагат жытелям Украіны достати ся в безпечны місця, зобраны грошы презначены будут м.ін., жебы пошырити ґрупу осіб, котра одповідат на безпосередній контакт зо страны жытелів Украіны і реализує транспорт і побыт в Польщы;
Polska Akcja Humanitarna – од самого початку конфлікту, од 2014 рока помагают потерпілым жытелям Украіны, довозят ідло, лікарства, гіґієнічны продукты;
Fundacja PCPM – несут гуманітарну поміч і психолоґічну підтримку;
Fundacja Świętego Mikołaja – поміч для діти.

МАТЕРИЯЛЬНА ПІДПОРА:

уж тепер можете комплетувати медичны річы (лікарства, бандажы, перевязкы ітп.), коцы, облечыня, лямпкы, батериі, воду во фляшках, ідло (з долгым терміном храніня), пеленкы, матерацы, ручникы. Уряды в каждым векшым місті одберут іх спакуваны в картоны або мішкы.

ВОЛОНТЕРСКА ПОМІЧ:

потрібны сут особы, якы свобідно бесідуют по украіньскы/росийскы, якы сут професийональныма перакладачами, психолоґами, правниками, знают дати основну медичну опіку. Веце чытайте гев.
поміч при візді до Польщы – сконтактуй ся з особами, котры сут на Украіні і хотят приіхати до Польщы, і докладні поясний ім, як можут тото зробити – гев найдете дрібницьову інструкцию.