Японьскый дослідник на Підкарпатю

Норіо Інагакі – японьскый дослідник, пришов тот тыждень на Підкарпатя, жебы досліджав містный етноколоріт. Інагакі робить на Інштітуті фолклору і архівів Румуньской академії наук в місті Клюж. Інформує о тім портал 7dniv.info.

Інагакі перед майже двома роками зачав проєкт, цільом котрого є найти найхарактерістічнішы приклады нематеріалной културной дідовизны різных етносів, котры жыють на теріторії Україны, Румунії, Булґарії і Сербії. Дослідник хоче здокументовати найвеце характерістічны пісньовы і танечны інтересности і сотворити тематічну відеотеку. Окрім того хоче выдати моноґрафію, де буде аналітічно порівньовати найджены взірці.

Норіо Інагакі од початку свого досліджіня уж мав можливость познакомити ся із културнов дідовизнов Івано-Франківской области і Підкарпатя, де перед роком штудовав традіції на Виноградівщіні. Тот тыждень планує навщівити гірьскы і передгірьскы теріторії Підкарпатя і стрітнути ся з домашніма людми, котры всокочують фолклор, або суть його інтерпретами.

Фотоґрафія: 7dniv.info.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА