Євген Жупан про лем.фм: Русины не мають зо стріляньом нич

В суботу проходили в Мукачеві смутны події, коло котрых дішло ку стріляню і ку людьскым жертвам. Радіо Свобода вже стигло публіковати статі, в котрых знова копе до Русинів. Непрямо вказує на Русинів як на тых, котры таксамо можуть за події в Мукачеві. Про лем.фм ку суботнім подіям выразив ся Євген Жупан, председа Народной рады Русинів Закарпатя.

Суть суботні події в Мукачеві повязаны з народностныма проблемами?

Тото не є жаден міджінародностный конфлікт. Абсолутно то з тым не є повязано. Ту на Підкарпатю всі народносты жыють спокійно в мірі. Наш край є спокійный. Тото суть бізнісово-кріміналны діла. Хтось хоче міджі собов перерозділити сферы влияня. Події зо суботы, котры скінчіли траґічно, суть повязаны з тым. Тоты ґрупы то самособов хотять схосновати і в політічных цілях, повісти, же то повязано з народностныма вопросами, но абсолутно то з тым нич не має.

Радіо Свобода публіковало дві статі, єдну од Олександра Гавроша, другу од Петра Кралюка, в котрых ся знова назначує, же Русины суть сполуодповідны за події в Мукачеві.

Абсолутно ніт. Такы „гаврошы“, котры цілый час гавкали і гавкають на Русинів, они лем выповнюють свій проґрам, котрый не має жадне обґрунтованя, не має фактів. Вже неєден раз пробовали робити провокацію проти Русинів. То лем вказує, же они неспособны економіку піднимати, демокрацію піднимати, просто нич, і теперь глядають „ворога“. За 25 років доказали лем то, же ся нашли на посліднім місці в Европі. Так теперь їм Русины перешкаджають. Хоць Русины неєден раз вказалим же суть законопослушны так, же такых людей треба глядати. Гаврош не має першыраз антірусиньскы выпады. Є то знамый русинофоб, котрый выповнює якусь спец-задачу, котра офіціално кривдить Русинам.

Яка є моментално сітуація в Мукачеві?

Ту моментално сітуація спокійна. Бойовници (Правого сектора – позн. редакції) втікли десь до гор. Там їх переслідюють. Мы не знаме, де властно конкретно пішли. То є барз, барз плано, же до такого дішло в нашім краю. Але то є лем дзеркалом того, же нестабілна сітуація є в цілій державі і не рішыть ся тота сітуація. Без контролы продовжує война, без контролы роздавають ся збрані. Як правоохорона не має в руках контролу, то лем на хосен дестабілізації і такым подіям, котры можуть стати ся в хоцькотрій области Україны. Барз мі жаль, же в нашім краю, де люди жыють в мірі і в злагоді, дішло ку чомусь такому.

За розговор дякує Петро Медвідь.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА