Ювілей 250. річниці будовы церкви св. Димитрия в Чарній

(фот. beskid-niski.pl)

Любителі села Чарна просят на спільне празднуваня 250-річниці будовы церкви св. Димитрия в Чарній. Празднуваня буде проходило в днях 8.-9. листопада і зачне ся Богослужыньом о 11.00 год., пак в пляні єст іщы м.ін. спільний обід, одвиджыня Руской Бурсы в Ґорлицях, забава і выступы в Снітниці, наступного дня выізд до Крениці і на св. Гору Явір в Высові. До 27. жолтня прошены сут о зголошыня тоты, котры хотят спільні забрати ся з ґрупом зо заходу. Дрібниці найдете на нашым портали.

Церков св. Димитрия в Чарній была побудувана в 1764 році, є то церков орієнтувана, деревяна, зрубовой конструкциі, тридільна – з выдолженым олтарьом, шыршым храмом вірных вознесеным на пляні квадрату і столпово-рамовом вежом обнимаючом притвор. Стіны обиты сут ґонтом, вежа шалювана дошками, дах з бляхы. Над олтарьом каленицьовий, над храмом вірных шатровий, двократні ломлений, з додатковом каленицьом, яка лучыт го зо стіном вежы. Над вежмом шатровий дах. Над вшыткыма частями бані з псевдолітарнями і желізныма крестами горі. Середину прикрашат орнаментальна поліхромія з першой половины ХІХ ст., є тіж комлетний бароковий іконостас з ХVIIІ ст.
Село Чарна находило ся серед сел мушыньского ключа, было радше меньшым селом, найбілше жытелів рахувала перед обома війнами, на початку ХХ ст. – ок. 450, хыж было 82.