З Ліґниці і Любіна потягом до Берліна, Відня, Будапешту і не лем

Лем 3.5 год. іхало ся буде потягом з Любіна до Берліна, до того безпосередньо буде мож доіхати м.ін. до Відня, Будапешту ци Щеціна. Од 15. грудня/децембра 2019 р. зміны в сіти далекых получынь PKP Intercity на Нижнім Шлеску.

Любін, до котрого аж в червци/юнію, по вельох роках, вернули реґіональны потягы, стане ся стацийом, де затримают ся не лем далекы, але і медженародны потягы. Зміну трасы переіздів потягів, якы лучат Вроцлав і Зелену Гору, PKP Intercity заповідало уж в вересни/септембрі. Час переізду не має ся більшыти, але компанія обслужыт два великы містецкы осередкы: Ліґницю і Любін.

Разом через Любін і Ліґницю будут іти 4 далекы потягы катеґориі TLK (Twoje Linie Kolejowe) i IC (Intercity) та єден медженародный, котрым безпосередньо дотерти буде мож м.ін. до Берліна, Братиславы, Будапешту ци Відня. Потяг веде ваґоны до каждого з тых міст. Австрийска Желізниця потвердила уж реляцию того потягу. На сайті перевозника доступны сут уж білеты з Ліґниці і Любіна до выміненых міст та до посередніх місц затриманя. Найтуньшый білет мож достати уж за 19 евро. Місця мож резервувати в ріжным стандарді, тіж такы, де мож сой лачы.

То, же потяг може іти через Любін, то ефект великой інвестициі PKP PLK (Polskie Linie Kolejowe), котре комплетні змінило обставины ведіня руху медже Рудном Ґвізданів а Ліґницьом.