З Варшавы до Дуклі. Малярство Уршулі Лойко-Смоґожевской

«Для Улі малярство то афірмация жытя, Творіня, натуры, єст записом часу. Сесы композициі реализуваны в ріжных, зріжницюваных техніках припоминают фаребны вітражы, абзацы старых книг, сут особливым писмом, значыньом мысли, знаком, авторском синтезом. Роботы выріжнят гляданя простоты і безпосередніст» – описує творчіст Уршулі Лойко-Смоґожевской проф. Мариюш Вощыньскій. Бескідскы образы артисткы буде мож обзерати од 27. липця/юлия 2024 р. в Дукли.

Уршуля Лойко-Смоґожевска то артистка малярка, Варшавянка, абсольвентка Выділу Малярства Академіі Красных Штук в Варшаві, де в 2019 році здобыла наукову ступін доктора. Од років інспірує ся Бескідом, а од якісого часу мешкат в Дукли.

«Інспірациі для мойой творчой роботы находжу в природничым і культуровым краєвиді Карпат» – бесідує малярка.

Робит в техніці олійного і енкаустичного малярства на полотні, батіку на гадвабі і дереві та в техніці керамічного образу.

В Дукли малярству товаришыти будут поетицкы тексты. «Образом в місце описів товаришат поетицкы дідаскалиі, особисты як листы з хыжы або домів, котрым несподівано стала ся для ня Дукля» – оповідат о найблизшій выставі артистка.

В малярстві інтуіцийні хоснує скорочыня і синтезу форм штукы, глядат такых знаків, котры найтрафнійше зімают выбраный мотив. Не зосереджат ся на «ґадатливых» дрібницях, а чутливі підкрислят кольористичны нюансы. «Діє ся тото вшытко в лагідным скупліню, золотым світлі актуального, реального бескідского часопростору» – пише ся в анотациі выставы.

«Од років важным для ня джерелом інспіраций остає Бескід з його богатом духовом тканком, пейзажом, простором. Черговы малярскы циклі навязували до збераных гев мысли і пережыть» – оповідат малярка. Образы малювала найчастійше безпосередньо в пленері в техніці олійного малярства з енкаустиком (пчелім воском), керамічного образу, батіку на дереві, волні. Уршуля Лойко-Смоґожевска намалювала м.ін. такы циклі: «Іконостас значыт умісцевленый образ» (Лопянка 2011), «В Лопянці кєрмеш єст в першу неділю жолтня, а образы дає ся малювати лем з радости» (Лопянка 2013), «Бескід. Субєктиный краєвид» (Ґорлиці, Музей Дворы Карвациянів і Ґладышів, 2023), «Бескід. Пареідолиі» (Крампна 2023), «Видиме ся в Бескіді» (Крениця, 2024).

Найновша выстава пн. «Дукля. Оправданя присутности» вказувана буде в Історичным Палаци в Дукли од 27. липця/юлия 2024 р., єй куратором є др Мирослав Рымар.

«Тото, што безсумнівно звертат увагу по стрічы з працами Уршулі Лойко-Смоґожевской, то простота формы і влияня кольорів. Єй образы сут інспіруваны натуром, часто пейзажом, при чым мают характер емоцийного, скорого запису пережываня. (…) Міцны фаребны плямы в єй образах – часто лем дві, три – дефініюют ціліст композициі. Площыны не сут єднорідны. Раз видят ся пляскаты, гейбы плякатовы, інчым разом сут зріжницюваны, деликатны, кладены на полотно як акварелі» – реферує др Мирослав Рымар.

«Кєд мате охоту і можливіст взяти участ в вернісажы, оповісти о образах, буде то для мене радіст і чест» – запрашат артистка.

Джерело ґрафік: ulojko.pl