Зачал ся Великій Піст

Вчера, 23. лютого, в східніх Церквах, хоснуючых тзв. старий стиль, зачал ся Великій Піст, будучий духовым і фізычным рыхтуваньом ся до найбільшого християньского праздника Світлого Воскресенія – Пасхы, котра того рока припадат на ден 12. квітня. Введіньом до того періоду были штырі неділі: о Мытарю і Фарисею, о Блыдным Сыні, Мясопустна і Сыропустна (вчас котрой вірны просят о пробачыня своіх вин і самы пробачают провины другым).

Великій Піст тырват сорок дни, од того, на памят посту Ісуса Христа, пробываючого сорок дни на пустыни, званий єст тіж Сороковином (або Четырдесятницьом), пак, через праздник Входу Господнього до Єрусалима (тзв. Квітну, або Вербну Неділю), іде ґу Страстному Тыжньови, коли Церков припоминат остатні подіі з жытя Христа перед Його розпятьом, а потім воскресіньом.

В начальным тыжни Великого Посту (од понеділька до четверга) в церквах чытаний єст Великій Покаянний Канон св. Андрия Критского, котрого пісні можете почути і в радию лем.фм (понедільок-четвер о 21.30 год.) в рамках архівальных проґрамів Духовна музыка.