Зачало ся Свято Діти Гір 2015

В неділю 19. липця, в Новым Санчы зачало ся ХХІІ Свято Діти Гір – Медженародовий Фестіваль Дітячых Реґіональных Ансамблів. До Нового Санча зъіхали ся ансамблі з Литвы, Молдовы, Тайвану, Сербіі, Ізраеля і Украіны. Лемкы, хоц спочатку не были того рока прошены, то єднак тіж возмут участ в фестівали – выступлят в заступстві ансамблю з Альбаниі, якій нещесливі мал выпадок в своій державі на пару дни перед початком фестівалю.

Фестіваль буде тырвал цілий тыжден і скінчыт ся фіналовым концертом в неділю 26. липця. Вшытко зачало ся од вельобарвного походу улицями Нового Санча, а од днес, штоденні през цілий тыжден, буде мож обзерати выступы двох ансамблів – єдного з Польщы і другого з інчой державы. Ансамблі уж на самым початку фестівалю лучены сут в пары і разом берут участ в концертах, товаришучых імпрезах і подіях та штоденным фестівальовым жытю, завдякы чому діти мают нагоду ліпше ся познати і навязати близшы реляциі. Минулого рока в Святі Діти Гір участ брали лемківскы ансамблі Кычерка і Сонечка, якы опікували ся ансамбльом Пирсос з Ґрециі. В рамках приближаня Грекам лемківской культуры, вшыткы ансамблі приіхали в гости до Руской Бурсы, де стрітили ся з бурсяном Терочком. Реляцию з той подіі найдете за тым мотузком.

Того рока в заступстві альбаньского ансамблю запрошено ґрупу Гречны фраіркы з Монастыриск з Украіны, яка в своіх заложынях мат вказуваня лемківского фолкльору. Детальний проґрам найдете за тым мотузком. Звернийте увагу, же окрем концертів в Новым Санчы, будут проходити додатковы концерты по інчых містах і місточках в реґіоні.

На знимці Ратуш в Новым Санчы (фот. архів лем.фм)