Заікуваня в писмі

Хоц од публикациі обшырного інтервю з новом Головом єдной з орґанізаций, што лем в назві лемківска (і на тым конец), минули уж такой два тыжні, допіро тепер, по фаховій консультациі найвыдатнійшых дохторів лоґопедів, приносиме ревеляцию, котра – як ся нам здає – зрушыт дотеперішнє знаня світовой лоґопедиі о заікуваню***.

Дотепер, лоґопеды знали лем оральний варіант заікуваня і ани не подумали о тым, же може быти даякій інчий. Отже, чытаючы інтервю з новом Головом (Наше Слово, номеры 3. і 4. за 2015 р.), спостерегли сме, же проблем може тыкати ся і писма!

Пікантериі приводженій нами ревеляциі додає факт, же нова Голова, охочо представляюча своі пляны Головы на будуче і быстро аналізуюча вшытко, што ся в лемківскым світі діє, заікує ся лем товды, коли бесідує о лемківскым скодифікуваным языку, радию ЛЕМ.ФМ, Стоваришыню Руска Бурса і Стоваришыню Лемків. Посмотрте-ле на пару примірів лем-лемківский варіянт, лем-лемків, лем-лемківске Радійо ЛемФм, лем-лемківски організації.

Уж сме думали, же то хыба коректора выданя, але пошпортали сме в архівальных номерах деякых ґазет і вказало ся, же проблем заікуваня в писмі, то проблем більшой кількости осіб ближе-дальше звязаных з орґанізацийом, што лем в назві лемківска (і на тым конец).

На тым кінчат ся нашы аналітычны компетенциі, зато передаме нашы спостережыня барже компетентным “американьскым дослідникам”. Но, іщы підповіме, же окрем заікуваня в писмі, члены орґанізациі, што лем в назві лемківска (і на тым конец), мают в своій бібліотеці книжкы писаны бесідом! Але то може быти тема не лем для лоґопедів, але і дохторів інчых специялізаций.

(на ґрафіці горі: цитаты з ґазеты Наше Слово, номеры 3. і 4. за 2015 р.)

*** Дослідникам і заінтересуваным – на Лемковині знана єст тіж фома загакувати, зато для ліпшого зрозумліня тексту, приводиме і тото часослово. Окрем того, маме іщы єдно часослово – гакувати. Оно тіж бы могло быти схоснуване в статі. Буде тема на наступну…