Закінчує ся проєкт Стежков ікон

Тот місяць в Гуменнім закінчує ся словацька часть мікропроєкту під назвов Стежков ікон зо Санока до Гуменного, котрый є співфінанцованый Европскым фондом реґіоналного розвитку посередницьтвом Проґраму черезгранічной співпраці.

Як інформовала словацькый денник Korzár Марія Мічкова із пресового одділіня міста Гуменне, в рамках мікропроєкту реалізовало ся вецеро актівностей. Меджі нима быв і пленер творчости народного уменя з тематіков ікон, на котрім брали участь авторы зо Словакії і Польщі.

Далшов актівностьов было вызначіня біціґльовой стежкы – Стежкы ікон. Тота стежка зачінать в центрі міста Гуменне, коло ренесанчного замку, іде через села напрямом на Меджілабірці і кінчіть на граніці з Польщов. Цілково має стежка довжку понад 53 кілометрів і є означена латиньсков буквов „C“.

В Гуменнім в рамках проєкту змодернізовали і турістічный центер, котрый є в будинку желізнічной штації. Так само выдруковали ся інформачно-пропаґачны матеріалы як турістічный проводник, публікація о інтересных місцях в пригранічнім реґіоні ці мапа з вызначенов біціґльовов стежков Гуменне – Меджілабірці – Полата – державна граніця як Маґістрала ікон.

Мініпроєкт є співфінанцованый із Европского фонду реґіоналного розвитку, і то 85-ма процентами, десять процент ішло із державного розрахунку і решту дофінанцовало місто Гуменне. Цілкова сума фінанцій, котры ішли на проєкт є 92 тісяч евр.

Стежков ікон зо Саноку до Гуменного є проєкт реалізованый двома партнерами – Саноком і Гуменным. Цільом проєкту є підняти рівень тырвало утримателиного хоснованя културной і природной дідовизны турістами і жытелями. Веце о проєкті мож дочітати ся на його офіціалнім сайті, котрый має польску і словацьку верзію.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА