Замениці прозвучали голосом Лемків

В суботу 6. липця/юлия в Заменицях на Нижнім Шлеску одбыл ся ХХ Лемківскій Кєрмеш, якій традицийно проходит при місцевій грекокатолицкій парохіі св. Йоана Крестителя. Прикликана была памят на акцию «Вісла».

Заменицкій Кєрмеш од років звязаный є тіж з Медженародным Фолкльористичным Фестівальом «Світ під Кычером». І того рока посеред Заменичан вказуваны были танці і музика тіж з культурово одлеглых місц.

Стріча зачала ся Молебном до Пресвятой Богородиці в заменицкій церкви. «Кєрмеш то все великє свято для нашой соспільности. З приємністю запрашаме в нашы гостинны порогы, жебы вказувати нашу богату культуру, але і познавати культуры інчых народів» – повіл парох о. Павел Березка.

По молитві чысленны делеґациі склали квітя під пропамятном таблицьом, жебы оддати чест выселеным в рамках акциі «Вісла» і іх близкым. Серед присутных были представникы самоурядовых власти з заступцьом війта ґміны Хойнів Радославом Ліпом, ґмінныма радниками, представниками сел та, головні, чысленні згромадженом лемківском спільнотом – з ґміны Хойнів і сусідніх ґмін. Квітя зложыла тіж делеґация першой в Польщы повыселенчой соспільной орґанізациі – Стоваришыня Лемків, в особах: Андрий Копча, ведучый Головного Заряду СЛ та Євген Габура – заступця ведучogo Головного Заряду СЛ.

Промамятна таблиця уфундувана была перед двома роками з ініциятивы війта ґміны Андрия Пыжа, в 75. річницю акциі «Вісла». Того рока минуло уж 77. років, одколи мешканців полудньово-східньой Польщы примусово розогнали по західніх і пілнічных землях державы, на все зміняючы традицийный цикль жытя вельох соспільности. Лемкы зо Щавника, Мушынкы, Верхомлі, Ново Веси трафили до підхойнівскых сел – Рокыток, Замениц ци до Ярошівкы.

Днес потомкове выселенців припоминают о траґічных діях своіх родин, активно тіж плекают лемківскы традициі та язык.

По реліґійній і пропамятній части одбыли ся концерты – выступили так реґіональны, місцевы колекитвы, як і запрошены гості з заграниці, якы брали участ в Фестівали «Світ під Кычером». В тот ден видіти было мож і русиньску культуру з Пряшівской Руси – окрем домашніх лемківскых ансамблів запрезентувала ся Маковиця зо Свидника.

На пляци при церкви вказувана была тіж выстава облечыня з колекциі Лемківского Ансамблю Пісні і Танця «Кычера». Обік великоформатовых старых фотоґрафій, на експозиторах презентувана была репліка давного традицийного крою, в тым парадны плащы здоблены футром ци барже штоденны опліча, ляйбикы і чугы.

Фот. e-legnickie.pl