Пущаня для діти на конец мясниц. Будут забавы!

Ци будеме дерти піря, як то давно робили вчас мясниц? А може вырабляти ґонты? Бо і так проводили тот час. Іщы ся задумаме, але конечно будеме попелом чыстити вшыткы горці і пательні перед Великым Постом, жебы ани капинка од мясного ся на них не лишыла. Але предовшыткым – мило проведеме час. Буде музика, будут світла, будут забавы і конкурсы для діти. Просиме до Руской Бурсы в Ґорлицях на пущаня для діти на 25. лютого/фебруара тр. од 16.00 год.

Подля народного календаря мясниці, значыт час медже святом Йордан а початком Великого Посту, вызначали початок весняного циклю свят і обрядів. Хоц царює іщы зима і яри нияк не видно, то мясниці помалы уж ся кінчат. По давному был то все єден з найвеселійшых періодів в календари, тырвал од парох до парунадцетьох тыжнів – в залежности од того, коли выпадала Пасха і попереджаючый єй піст. Орґанізували товды найвеце весіль. Особливо веселым был послідній тыжден мясниц, тзв. пущаня. Всядиль рыхтували гостины і забавы.

Было піря, были дівчата, были парібкы

Продолжаючы народну традицию, просиме на одомаш до Бурсы. Може дерти піря не будеме, ани вырабляти ґонтів (котрых робили на копы, бо по зимі треба было выміняти погнилы ґонты на дахах хыж, сыпанців, дашках на шопах ци пивничках), але спрібуєме вымінити ся знаньом про тото, як давнійше рыхтували ся до Великого Посту, што іли в тым часі, як зачынали весняны роботы на поли і якы маґічны обряды были з тым звязаны. І як рыхтували хыжу перед самым Великодньом.

А може дахто буде памятал згадуванкы, котры хлопці задавали дівчатам, котры заняты были скубаньом піря? Бо так як і при вечірках, так до дертя піря молоды змавляли ся до єдной хыжы і каждого тыжня заходили до інчой. Дівчата заняты были роботом, а парібкы  збыткуваньом – робили жарты, показували ріжны штучкы, оповідали приповідкы і задавали дівчатам згадуванкы.

Забавы для діти

Для діти заплянували сме забавы і конкурсы при музиці, з музиком, а моментами і без. Сходити мож ся на 16.00 год. Вступне дармо, а на столах буде тото, што каждый принесе. Місце: Руска Бурса (ул. Сєнкєвича 28, Ґорлиці).