Жорж Бізе, «З повагом», просит Павел Малецкій – неділя, 20.00 год.

Жорж Бізе был XIX-вічным французскым оперовым композитором епохы романтизму. Знаный є головні з двох творів граных на оперовых сценах цілого світа: «Крамен» та «Імаючы перлины».

Жорж Бізе вродил ся в 1838 р. в Парижы в родині з музичныма корінями. Матір была піаністком, отец композитором і учытельом співу. Родиче были першыма учытелями малого Жоржа. Нич Ж. Бізе скінчыл 10 років, принято го до парижской консерваториі, де студиювал гру на фортепіані та органах, а тіж контрапункт і композицию.

В 1855 р. написал першый значучый твір – Симфонію Ц-дур. Неодолга пізнійше отримал престіжову премію Grand Prix de Rome, котра дала му трилітню стипендию в Італиі. В Римі скомпонувал м.ін. оперу «Don Procopoio», реліґійный твір «Te Deum» ци оду «Vasco da Gama» на хор і симфонічну оркєстру.

Коли в 1860 р. захворіла му мама, вернул до Парижа. По єй смерти Бізе ся заламал, одшмарил пропозицию роботы в консерваториі, зосередил ся на компонуваню. В тым часі написал єден з найславнійшых своіх творів – оперу «Імаючы перлины». В часі пруско-французской войны взято го до войска. В 1873 р. скомпонувал славну оперу «Кармен». Думат ся, што початкове холодне принятя той композициі причынило ся до погіршыня ся здоровля артисты, котрый вмер на атак серця в 1875 р.

В проґрамі выслухате м.ін. фраґментів з опер «Кармен», «Імаючы перлины», Симфонію Ц-дур та і дакус знаных творів інчых клясиків.