Зміны на лемківскых парохіях во вроцлавско-щеціньскій єпархіі ПАПЦ
Інформацийом з дня 21. грудня/децембра 2020 р., яка публикувана была на офіцияльным сайті вроцлавско-щеціньской єпархіі Польской Автокефальной Православной Церкви, архієпископ Юрий провюл персональны зміны настоятелів декотрых парохій на обшыри завідуваной ним єпархіі.
На єпархіяльным сайті публикуваны сут поєдны чысла єпископскых декретів. Серед постановленых змін находят ся зміны, котры односят ся до лемківскых парохій на чужыні. Єґомость Ярослав Шмайда, якій дотля завідувал ґожівском парохійом, з дньом опубликуваня інформациі был менуваный парохом церкви Рождества Пресвятой Богородиці в Лешні Ґурным в місце о. митр. Ігоря Поповича, якій фурт служыт в Пшемкові. Зас о. митр. Славомир Кондратюк, якій од січня/януара 2019 р. служыл окрем Зимной Воды і в Михалові (бл. Любіна) перестає быти парохом церкви в св. Михала Архангеля в Михалові.
По смерти о. митр. Михала Шляґы, новым настоятельом парохіі в Мальчыцях менуваный был о. Адам Горбаль, якому так само была поручена опіка над вірныма парохіі в Михалові. О. Горбаль принял діаконьску і єрейску хіротонію в листопаді/новембрі т.р. в катедральным храмі во Вроцлаві.
Владыка Юрий вызначыл о. прот. Любомира Воргача на становиско учытеля в Школі Церковного Співу в Цєпліцах (Єленя Гора) в місце о. Томаша Мендрицкого, якій менуваный был парохом парохіі в Ґожові Великопольскым. На основі дальшого декрету о. Артур Грабан, на час здравотного урльопу о. Жорначука, обнимат адмініструваня парохійом в Валчы.
Спомнены парохіі в Михалові, Лешні Ґурным, Ґожові Великопольскым і Мальчыцях творят в більшости потомны переселеных в 1947 р. вірных з Лемковины. Парохію в Михалові завязували м.ін. переселенці з Фльоринкы. Там же была як перша і такой єдина на західніх землях Польщы побувудана церков в західньо-лемківскым стилю.
