Уж заран, 13. липця/юлия 2019 р., в осередку культуры Арена в Креници проходила буде 2. едиция концерту під видоковом вежом пн. «Звукы гір». То вынятковый концерт, орґанізуваный в пленері, в горах, на самым іх верху.
В такым як раз місци буде мож почути музику, яка асоциює ся з натуром: з вітром, сонцьом, дощом ци снігом. Але і з мелянхолийом, радістю, енерґійом.
Інспіруваны природом
Інспірацийом для артистів рыхтуючых концерт была сама природа. Серед гірскых верхів, зеленых лісів і лук створеных было вельо пісен і творів. Зато тіж зродила ся думка зобрати тоты выріжняючы ся музичны климаты. Такій пленеровый концерт, серед гір, напевно надаст выконуваным творам особливого звучаня. Што більше, артисты в своім репертуарі сягнули не лем до польскых творів, але і музикы створеной на основі лемківского, словацкого, украіньского, мадярского і арґентиньского фольклору. Концерт ма на ціли приближыти публиці музику інспірувану горами, однести ся м.ін. до лемківской культуры, вказати климат фольк і етно, але в нештоденным выданю, вводячым модерны, джазовы аранжациі. Другій уж раз концерт опрацуваный был найвыдатнійшым польскым акордеоністом і бандонеоністом, Вєславом Пжондком.
Артистичный директор концерту, Вєслав Пжондка, запросил до проєкту вельох артистів. Серед них находит ся Артур Андрус, журналиста, поета, автор текстів співанок, вокалиста, кабаретовый артиста і конферансиєр. Выступит і Ганна Банашек, вокалистка і поетка, котра выконує стандарды музикы джазовой і розрывковой 20. і 30. років та новы співанкы. Буде і польскій композитор модерной і фільмовой музикы, джазовый гушляр і дириґент, Кжесімір Дембскій. Почути буде мож і Юлию Дошну, Смычкову Оркєстру Музичной Академіі в Лодзи – Прімуз, ансамбль твореный ґуралями зо Шлезского Бескіду та клясичных музиків – Волосів, ансамбль з Арґентины – Зампона ен Тріо, і музику мультіінструменталисты, музичного продуцента і композитора, Йошка Броды.
Концерт зачне ся о год. 20.30 в вынятковым місци – в Креници, в місті, в котрым творило або фурт творит свою музику вельох Лемків, але тіж в місті, котре знане єст з орґанізуваного уж од 50. років Фестівалю Яна Кєпуры. Концерт одбуде ся, як сме споминали, в выжній части осередка Солотвины Арена, на верху посеред ліса і гірского краєвиду. Над ним находит ся видокова вежа, до котрой веде кілометрова деревяна стежка поміщена в коронах дерев. Вступне продаване єст в цінах од 119 до 169 зл.
Коментарі