Голосник

Богата русиньска културна осінь

Тогорічна осінь досправды богата на русиньскы културны події. Видіти буде мож нажыво Рутенію, Штефана Штеця, тішыти ся мож і на новы выставкы в Словацькім народнім музею – Музею русиньской културы в Пряшові, а і много далшого.

Выбрали сьме про вас тоты найнтереснішы події, котры маєме в місяцях новембер і децембер 2019-го в мерьку.

Земля обіцяна

Русиньскый Фолклорный ансамбель Рутенія з Братіславы ся почас осени представить на выході Словакії із своїм найновішым проґрамом, котрый дістав назву Земля обіцяна. Іде о танечно-драматічну інсценацію, в рамках котрой можете видіти на сцені і познаты твари акторів. 

Земля обіцяна приближує публіці дії, котры в Чехословакії проходили по Другій світовой войні. Іде о такзваны оптації, в рамках котрых ся тісячі людей, головно русиньской народности з выходной Словакії, на основі лживой пропаґанды добровольно приголосили выселити ся на теріторію Совітьской Україны. Веце о пєсі мож прочітати ту.

Рутенія своє турне зачінать в другій половині новембра і представить ся в пятьох выходословацькых містах. Дня 23-го новембра 2019-го року зачне турне в Пряшові, де ансамбель представить ся в просторах Театру Александра Духновіча, о день пізніше на Землю обіцяну може тішыти ся кошыцька публіка в Театрі Талія. Першый децембровый вікенд буде мож видіти Рутенію в Левочі (6-го децембра) і почас слідуючіх двох днів у Свіднику і Старій Любовні. Тікеты на турне дають купити ся через портал rezervovane.sk.

Štefan Štec & Fajta TOUR Jeseň 2019

І харізматічный русиньскый співак Штефан Штець зачінать уж в середу своє турне по словацькых містах. Вєдно із свойов ґрупов Файта представлять публіці найсвіжішы новоты і несподіванкы з приготовльованого албуму, котрый бы мав выйти кінцьом рока пді назвов Дує вітор. Хыбити не будть ани найвекшы гіты.

Любителі Штефана Штеця ся можуть в рамках турне тішыти і на далшы інтересны мена, котры будуть выступати як гості в окремых містах.

Турне зачінать 6-го новембра в Історічній радніці в Кошыцях, 9-го новембра привітать Штефана Штеця Atelier Babylon в Братіславі, 16-го новембра го можуть видіти Пряшівчане в просторах Кіна Scala i новембровы выступліня будуть закінчены у Зволені 24-го новембра, в Домі културы Podobrová. На децембер є іщі напланованый концерт в Снині, конкретно 7-го децембра в містнім Домі културы. Тікеты мож купити на сайті predpredaj.zoznam.sk.

Події русиньского музею

І Словацькый народный музей – Музей русиньской културы в Пряшові приготовив на осінь богатый проґрам. На місяці новембер і децембер уж суть напланованы три інтересны події.

Наш музей найблизше позывать на далшый новый проєкт, котрый дістав назву Музей місту і селу, Місто і село музею. Дня 12-го новембра о 16.00 год. представлять ся в музею штири села Меджілаборецького окресу: Радвань над Лабірцьом, Воліця, Збудьска Біла і Валенітвіці.

Старина – вода віры, то выставный выбер фотоґрафій з проєктів Руснаци (рр. 2006 – 2007) і Свідоцтво спід Пляшы (рр. 2011 – 2016). Є то фотодокументція о выселенцях з области сел, котры затопили з причіны будованя водного резервоару Старина. Выставка буде одкрыта 21-го новембра і потырвать до 21-го януара 2020-го року.

На децембер музей приготовив выставку під назвов Дубайовы. Вернісаж творів знамого вытварницького роду одбуде ся 5-го децембра і выставка потырвать до 5-го мая 2020-го року.

Події орґанізації молоды.Русины

Орґанізація молоды.Русины сердечно запрошать найблизше довєдна ся молити на Божественній літурґії, котра ся одбуде у віторок 12-го новембра o 19:00 на інтернатах на уліці Єдлікова 7 в Кошыцях.  Церьковнославяньску літурґію буде служыти протосінкел Кошыцькой ґрекокатолицькой єпархії отець Ярослав Лайчіак з чітаньом євангелія і проповідьов в русиньскім языку. По літурґії слідує діскусія на тему Святый мученик Йозафат, мучеництво як свідоцтво віры і правды.

Молоды позывають і на співацько-театралне выступліня під назвов Рік на селі. В проґрамі вам выступаючі представлять різны обычаї, звыкы, обряды і пісні, котры были вызначнов частьов жывота людей почас цілого року. Тішыти ся можете на ФСҐ Вородай з Великого Липника, ФҐ Кечера з Якубян і співачку Наталію Кучову з Літмановой. Подія одбуде ся 16-го новембра в Културнім домі в Іглянах зо зачатком о 18.00 год.

Ани тот рік не буде браковати подія під назвов Вечур русиньскых голосів, котру приготвлюють молоды.Русины. Одбуде ся 26-го новембра o 18.00 год. в просторах Універзітной бібліотекы Технічной універзіты в Кошыцях. Можете ся тішыти на Фолклорну ґрупу Яворина з Торисок, Катедралный хор свв. Кіріла і Методія з Кошыць і ґрупу RuSnack‘s з Пряшова. Вечoром буде проводити Володимір Чема.

Інтересны події і в Празі

І в Празі будуть в найблзшім часі інтересны події, котры повязанаы із Русинами. Вже 6-го новембра запрошать Общество приятелів Підкарпатьской Руси на бісіду з Іваном Латком, предсидательом Клубу Томаша Ґаріка Масаріка в Ужгороді, выдавательом і вызначным підкарпатьскым актівістом. Темов бісіды будуть події на Підкарпатю присвячены сторічніці приєднаня реґіону ку Чехословакії, сучасна сітуація, чеська і словацька меншына на Підкарпатю і їх общества. Подія зачінать о 16.30 год. в Домі народностных меншын на уліці Воцелова 3 в Празі.

20-го новембра в Празі одбуде ся презентація книжкы Барборы Заваділовой під назвов Моя русиньска вышыванка. О тій книжці писали сьме уж скоріше. Авторька свою книжку одпрезентує в Ґалерії Дому народностных меншын і зачаток події є о 17.00 год.

Остатня подія, на котру варто іти, покля маєте можливость, то Округлый стіл на тему Підкарпатьска Русь і Русины в чеськых землях. Орґанізаторами округлого стола суть Академія народностных меншын і Общество приятелів Підкарпатьской Руси. Подія одбуде ся 4-го децембра в Домі народностных меншын і тематічны округы суть: Підкарпатьска Русь в рамках Чехословакії 1919 аж 1939 рр. – Русины в меджівойновім періоді, Русины/Українці по Другій світовій войні в Чехословакії і Русины в Чехословакії по 1989-ім році.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі