Голосник

Дідовизна Юрія Мацана в сниньскім каштелю

Місто Снина і Містьскый културный і освітній центер в Снині орґанізують выставку, котра презентує творчость вытварного педаґоґа і умелця Юрія Мацана. Родак із русиньского села Руське, котре вже днесь не існує, належав меджі особности вытварного жывота в Снині по 1970-ім році.

Ціложывотнов темов вже небого вытварника была родна країна – країна отців, дідів, прадідів, як і закутины повны квітів реалізованы олійом і сухым пастелом.

Учітель і малярь

Юрій Мацан цілый свій актівный жывот присвятив учітельованю, коло того все нашов собі час і на властну творчость. По закінчіню єденацятьрічной школы в Снині одышов як некваліфікованый учітель до Збоя. Там пришов на то, же має талент про вытварну творчость. По році одышов штудовати вытварну выхову.

По закінчіню высокошкольскых штудій 15 років учів на школі у Великій Поляні. Окрім того занимав ся мальованьом. Робив олійомальбы, сухый пастел і лавіроване рисованя тушом. Фасціновала його архітектура деревяных храмів на выході Словакії.

Сухым пастелом поступно звічнив храмы в Руськім Потоці, Тополі, Яловій, Шмиґовці. Захопив і храм з Новоселиці, котрый находить ся в гуменьскім сканзені ці церьков зо Збоя, котра є в сканзені в Бардейовскых купелях.

Образы не продавав

Свої образы не продавав. Даровав їх понад тісяч. Суть в пріватных збірках в Братіславі, Кошыцях, Снині, Гуменнім і околіці. Його творы попутовали і до Белґії, Німецька, США ці Чеськой републікы.

Выствка Юрія Мацана буде в просторах каштелю в Снині приступна од 15-го новембра 2019-го року до 25-го януара 2020-го року. Святочна вернісаж одбуде ся 28-го новембра о 17.00 год.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі