Голосник

„Досправды“ Русиньска ватра буде тот рік знова богатша

0
В днях 19-го аж 20-го юла 2019-го року одбуде ся юбілейный 10-ый річник Русиньской ватры на Малім Липнику, котрой орґанізаторами суть орґанізація молоды.Русины, Фолклорный ансамбель Рутенія і село Малый Липник.

„Досправды русиньска“ собі дали орґанізаторы як лайтмотів події, бо шторік є проґрам фестівалу чісто русиньскый, што не мож повісти о іншых фестівалах, котры мають в назві придавник „русиньскый“. Навеце тот рік чекать участників розшыріня проґраму і звекшіня фестівалового ареалу.

Новоты на фестівалі

О новотах на юбілейнім річнику фестівалу про нашу редацкію повів Петро Штефаняк, основатель і єден із головных орґанізаторів ватры, яка робить ся на граніці меджі Словакійов і Польщов.

„В пятніцю сьме розшырили проґрам о концерт. В попередніх річниках была на тот день напланована лем школа танця, лекція і забава. Так само сьме звекшыли ареал цілой події, котрый буде мати одділены зоны про супроводный проґрам і проґрам на головній сцені. То ся в практіці вкаже в суботу, коли є денный проґрам поділеный на головній сцені до трьох блоків, меджі котрыма буде проходити проґрам в далшых зонах фестівалу,“ повів і новотах Штефаняк.

Як далше інформовав, тот рік хотять мати на Русиньскій ватрі векшый напрям на літературу, но не забыли ани на найменшых. „Про діти буде тот рік веце атракцій,“ доповнив орґанізатор. Тогорічнов новотов, котра затля не є планована як правило про далшы річникы, є і то, же літурґія, котров зачінать суботняйшый проґрам буде прямо в ареалі фестівалу.

Штець і Русиньске тріо

На юбілейній ватрі буде мож видіти наприклад Столичного джывкы, Верьховину, Тріо Кантар, Барвінок, Фолклорный колектів Горнад ці братіславску Рутенію.  Хыбити не будуть ани успішны і штораз веце популарны участници шов словацькой державной телевізії Zem spieva Штефан Штець і Русиньске тріо.

На сцені буде мож видіти і інтересну фузію двох колектівів – Горнаду і Рутенії. Тоты споять ся в сполочнім танечно-драматічнім проґрамі о оптаціях Русинів із Чехословакії по Другій світовій войні. Обидві фолклорны тілеса у 2018-ім році приготовили на тоту тему свої представліня – Рутенія проґрам під назвов Земля обіцяна, Горнад проґрам Справы, што ся діють. Фестіваловы навщівници будуть мати можливость видіти фраґменты тых представлінь в єднім сполочнім приблизно годиновім проґрамі. Комплетный проґрам можете прочітати на плаґаті під статьов.

10-ту Русиньску ватру на Малім Липнику фінанчно підпорив Фонд на підпрору културы народностных меншын і Фундація Татра банкы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар