Голосник

Фантазія прийде і на фестівал до Свідника!

Театер Александра Духновіча в Пряшові – єдиный на світі професіоналный русиньскый театер, як свою другу премєру у своїй юбілейній 70-ій сезоні приготовив твор Фантазія Козьмы Пруткова. Режії песы в тлумачіню Валерія Купкы ся тот раз в театрі хопив Светозар Спрушаньскый, котрый з театром співпрацовав вже на дакілько пєсах. Фантазія теперь прийде і на фестівал до Свідника.

Пруткова Фантазія є легоньков комедійов зо співанками. Публіка ся буде коло позераня на ню файно забавляти. А нелем тото! Козьма Прутков (леґенда, но вєдно з тым выдумка і фікція) – в реалности Алексей Толстой і Алексей Жемчужников, написали „vaudeville“ Фантазія із ясным заміром: пародованьом того жанру высміяти ся туньому смаку втогдышньой сполочности. Криве дзеркало того твору і днешній публіці вказує то, што денно конзумує. Річі і творы, котры єй вже ани не бавлять або бы єй бавити не мали. Бо іде о бесцінну забаву і ґіч. Пєса такы творы нелем зосмішнює, але ся односно них і крітічно вставлять. Кладе вопросы: У якім світі то днесь жыєме? У світі досправдовых вартостей або повсякденной поверьхности? Існує іщі уменя або лем його карікатура? Обколесує нас ґіч – в чінах і думаню? На чім ся іщі (або вже лем?!) в театрі докажеме забавляти? І о тім є кекешна, делікатно себепародічна, но все іронічна театрална комедія із пера російского класіка.

Премєра Фантазії в Театрі Александра Духновіча в Пряшові одбыла ся дня 11-го децембра 2015 р. В рамках Фестівалу културы Русинів Словеньска пєсу можете видіти у віторок 24-го мая 2016-го року о 19.00 год. На сцені свідньцкого Дому културы буде мож видіти Євґенія Либезнюка, Ладіслава Ладомиряка, Міріяму Ґайдошову, Людмилу Лукачікову, Светлану Шковранову, Зузану Ковалчікову, Даніелу Либезнюк, Ярославу Сисакову і Любоміра Міндоша.

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі