Голосник

I Ґорлицкій Фестіваль Хорів «Люз блюз фольк»

0

В суботу, 21. жолтня/октобра т.р., в театральній сали Ґорлицкого Центра Культуры прошол I Фестіваль Хорів «Люз блюз фольк». Його орґанізаторами были Стоваришыня Хорів «Бельферсінґерс» і ҐЦК. Концерт зреалізувано в рамках проєкту «Музычны інспірациі».

Задачом проєкту Хорального Стоваришыня «Бельферсінґерс» было привернути забыту традицийну світску музыку Погірян і Лемків та представити ю публиці в барже модерний, атракцийний спосіб. Думкодавці ініциятивы рішыли промувати світску хоральну музыку, зато же хоры в тым реґіоні асоциюваны сут головні з сакральном музыком.

В реалізациі того проєкту участ взял тіж Мірослав Боґонь, лемківскій музык і композитор. Боґонь є основательом вельох лемківскых ансамблів, є бывшым членом Лемковины, артистичным кєрівником ансамблю Серенча, акомпаніює і на концертах Сусанны. Нашол ся він тіж на платни «Дуляровы братя і приятелі». Пригрываньом на ґітарі, фортепіяні ци акордеоні спомагат вельох артистів.

Мірослав Боґонь зааранжувал на мішаний хoр дві погіряньскы і дві лемківскы пісні, котры пак опрацувал і приготовил до презентациі Камеральний Хор ҐЦК «Бельферсінґерс». Завершыньом роботы над репертуаром і підсумуваньом проєкту был концерт, на котрым мож было почути спомнены пісні.

Окрем Камерального Хору ҐЦК выступили тіж Стжыжовскій Камеральний Хор, Підкарпатскій Мужскій Хор і Хор «Кантабілє» з Лужной.

Вечер припомнул присутным про традицийну світску музыку, котра тым разом вызвучала кус інакше, мож повісти, барже інтересуючо. Запрезентуваны в такых аранжациях творы барз ся полюбили публиці, яка нагородила артистів горячыма оплесками.

Фот. Джерело: www.gorlice.pl

Шеруй.

О авторі

Наталія Клинковска

Коментар