Голосник

«Карпатскы Брамы: медже Ропом а Зборовом»

Ґміны Зборів і Ропа будут зо собом спілпрацувати. Зачало ся в 2017 році од концепциі, пак написаня спільного проґраму. Тепер пришол час на реалізацию. В плянах ремонт забытковых будинків, спільны акциі, школіня, аж і подипльомовы студиі.

29. вересня/септембра вчас Ярмаку св. Михала в Ропі прошла конференция, на котрій війт ґміны Ропа Кароль Ґурскій разом з партнерами проєкту поіфнормували о підписаню з Міністерством Інвестициі і Розвитку договору о дофінансуваню проєкту пн. Карпатскы Брамы: медже Ропом а Зборовом – охорона і розвиток спільной культуровой спадковины на польско-словацкым пограничы.

Ярмакы з лемківскым ремеслом

«Спілпраца медже Ґміном Зборів а Ґміном Ропа навязала ся в 2017 році» – бесідує Тадеиш Зайонц, одповідальный за промоцию Ґміны Ропа. «Війтове ґмін обдумали товды концепцию спільного проєкту до проґраму Інтерреґ Польща-Словация. До ініциятивы локальных самоурядів запросили додатковы інситуциі: Фундацию Благородне Здоровля, Православный Осередок Милосердя Перемышльско-Новосандецкой Єпархіі Елеос та Економічный Університет в Кракові» – вымінят Т. Зайонц.

Першом інавґуруючом проєкт задачом была орґанізация Ярмаку св. Михала в Ропі. Подібных імпрез буде іщы три, тіж в Зборові. В рамках першого Ярмаку промуване было лемківскє ремесло: мазярство і лжычкарство. Нажыво обі професиі презентували Вацлав Шлянта та Петро Міхняк. «Мы отворены на інчы пропозициі презентациі культурового богатства Лемковины» – бесідує інспектро Зайонц.

Новы оферты для туристів і фахова кадра

«Задачом вшыткых заплянуваных до зреалізуваня діянь є сотворити атракцийный проґрам спілпрацы промуючый культурове і природниче богатство польско-словацкого погранича» – стверджат Т. Зайонц. «Хочеме выкликати проґрамом соспільну активізацию і економічный розвиток, бо проєкт направленый є так на місцевых жытелів, як і туристів» – додає.

Серед конкретных задач проєкту є м.ін. консервация памятковых обєктів, находячых ся на обшыри ґмін Ропа і Зборів, а то: комплексу дворскых будинків в Ропі, будинку Антония Гыбля в Ропі та каплиці і замку в Зборові. Буде зрыхтуваный віртуальный путівник по ропско-зборівскым пограничы. «Реґіон, котрый обнимат проєкт, обнимат тіж Лемковину, зато в примірі такых діянь як віртуальный путівник ци промоцийный фільм, будеме вести консультациі з Лемками, підкрислити треба, што в ґрупі реалізаторів тіж сут Лемкы, а можеме тіж нашы мериторичны материялы консультувати з охочыма лемківскыма орґанізациями» – бесідує інспектор Зайонц.

Актуальні Економічный Університет рішат проґрам подипльомовых студий з обшыри заряджаня культуровом спадковином. До рыхтуваня кадры, котра буде вела трансграничну спілпрацу, окрем студий, орґанізуваны будут тіж специяльны школіня. В рамках проєкту ведены будут іщы едукацийны варштаты, стрічы і студийны выізды для неполносправных осіб.

Фот. горі: знимка з Ярмаку св. Михала в Ропі. Більше знимок найдете на сайті ґміны Ропа.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі