Голосник

Кычерияда над Качавом

0

Лемківскій Ансамбль Пісні і Танця «Кычера» рыхтує ся орґанізувати шор подій пн. «Кычерияда над Качавом», цілю якых мают быти пошырюваня істориі і культуры Лемків та презентация 25-річной діяльности колективу.

Як можеме чытати в описі ініциятивы на конкурсовым сайті «Активний Нижній Шлеск», в рамках проєкту «Кычерияда над Качавом» протягом парох дни мают пройти м.ін. вечер лемківской поезиі і промоция печатаного ансамбльом альбому «Облечыня Лемків в ХІХ – І пол. ХХ ст.». Зорґанізуваний має быти і лемківскій ден дітины «Лемколяндия».

Плянуваны сут і концерты. Перший з них – «Лемко… в Опері» – мат быти концертом цілого колективу при участи бывшых членів, котры завершыли артистичны школы. В другым, завершаючым шор акций, ґальовым концерті участ возме пару поколінь бывшых членів ансамблю, якы выступували од зачатку його основаня. Запрезентуваны будут памяткы з вельократных выіздів і турне ґрупы по ріжных частях світа.

В рамках проєкту зорґанізуваны будут і дві подіі присвячены примусовому оселіню Лемків по 1947 р. на західніх землях Польщы. Запрезентуваны будут премєра выпродукуваного ансамбльом фільму «Там досправды жыли сме як в Раю», якій оповідат про траґічне выселіня Лемків і ретроспективні вказує на прекрасне жытя перед ним, та выстава, што приближыт предовшыткым польскому обсерваторови обставины оселіня Лемків на Нижнім Шлеску.

Цілковитий буджет орґанізатор передвидил на близко 30 тис. зл. Дофінансуваня, котре Кычера може отримати в рамках конкурсу «Активний Нижній Шлеск», то 20 тис. зл. Голосувати можут особы, якы скінчыли 16 років і сут жытелями нижньошлезского воєвідства. Деталі за мотузком.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар