Голосник

ЛЕМ.фм на DAB+ во Вроцлавi

Радийо ЛЕМ.фм фурт поршырює обшыр, на котрі мож го слухати. Од середы 27. марця жытелі Вроцлавя і околиц можут одберати радийо ЛЕМ.фм через цифрове радийо в системі ДАБ+.

ДАБ+ то нова технолоґія, котра дозвалят одберати высокоякістный сиґнал, што не все є можливе при аналоґовым одбераню радия. До слуханя радия в стандарді ДАБ+ не треба быти підлученым до інтернету, старчыт одповідній, нового типу, модель радия, ци то домашній, ци замонтуваный в авті. Нашу стацию найдете не через частоту (як в примірі сиґналів высыланых з Ґорлиц – 106,6 MHz, або Польковиц – 103,8 MHz), а через вписаня назвы LEM.fm. Припоминаме, што окрем Вроцлавя, діґітально радийо ЛЕМ.фм мож одберати іщы на обшыри Ряшова, а жытелі Словациі, окрем інтернету, можут нас слухати, будучы абонентами словацкой кабльовой сіти Антік.

Днес, што раз більше стаций хоснує можливіст перейти на надаваня в тій модерній цифровій технолоґіі, яка уж тепер хоснувана є в 21 державах, головні в Европі. Радийо ЛЕМ.фм є по Польскым Радию єдным з першых в Польщы, котре мож в тій технолоґіі слухати.

Радия ЛЕМ.фм буде мож слухати завдякы рішыню DZC.WRT.5104.29.2018.8 Презеса Уряду Електронічной Комунікациі в Польщы з дня 11. лютого/фебруара 2019 рока. Є то річне позволіня на експериментальне высыланя Інституту Комунікациі (Instytut Łączności) – Державного Інституту Досліджынь во Вроцлаві.

Рішыня DZC-WRT-5104-29-2018-8 до вгляду

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі