Голосник

Лемковина Ультра Трейль 2019

Як што рока в першій половині жолтня/октобра орґанізуваный є єден з найтяжшых гірскых ультра маратонів, траса котрого веде головным шляком Низкого Бескіду. Змагаючы мали до выбору трасы долгости 150, 100, 70, 48 і 30 км, котры вели з Крениці до Команчы, з Крениці до Івонича, з Гыровой до Команчы, з Івонича до Команчы і з Пулав до Команчы.

Серед більше як 2 тисячы участників з вельох ріжных держав не бракло тіж здетермінуваных Лемків. Пятый уж раз в Лемковина Ультра Трейль участ брал Кристиян Трохановскій, котрый дакус оповіл нам про емоцйі, якы товаришыли му вчас змагань. Траса, котру выбрал рахувала 48 кілометрів, а його цілю было перейти єй в часі коротшым як 5 годин.

Маратон для Кристияна зачал ся о 10 год. рано. Траса вела медже інчыма через Пулавы, Прибышіб та такы вершкы як Скібці ци Буковиця. Як повіл Кристиян, обставины на трасі были барз добры, окрем сильного вітру, котрый міцно давал ся во знакы на полянах. Традицийні уж на пути в некотрых місцях было вельо болота, але і так траса была барз приємна. Як повідают ветераны змагань: «без болота то не єст Лемковина Ультра Трейль».

Орґанізаторы і того рока не завели. На трасі што якісый час находили ся пункты, де вольонтеры оферували теплу страву, напиток і дашто солодкє, были тіж локальны закускы. Пристанкы з ідлом не были єдиныма на трасі. Як пояснил Кристиян, тяжко єст ся хоцкі на хвилинку не затримати, жебы посмотрити з вершка на села, поля і лісы приоблечены в прекрасны осінні кольоры, а предовшыткым – посмотрити на лемківскы горы.

А якій єст найліпшый момент цілой трасы? Не трудно ся додумати, же єст то мета. Крикы, пищаня, вельо люди, вольонтеры, родина, знаємы, а до того вельо емоций по закінчыню маратону. Повело ся осягнути вызначену ціль – Кристиян закінчыл трасу з часом 4 год. 55 мин 1 с, што дало му 15. місце в клясифікациі на тій долгости. Хоц тішыт ся з того, то уж заповідат, же то не конец і за рік зас приіхат, тым разом, жебы змірити ся уж з 70-кілометровом трасом.

По закінчыню змагань на вшыткых участників ждала горяча вода, жебы ся вымыти, была аж і сауна та розгріваюча поливка – знана уж вшыткым запаленым змагаючым ся на Лемковына Ультра Трейль. Для тых найбарже вытырвалых, в суботу вечером до спільной забавы пригрывал лемківскій ансамбль Бурян.

Фот. Фб ЛУТ

Шеруй.

О авторі

Avatar

Коментарі