Голосник

Ліґницка Велия Народів уж того тыжня

0

Уж в найблизшу неділю, 18. грудня/децембра, в Ліґници пройде ХV Ліґницка Велия Народів. То святочна стріча, орґанізувана рік-по-рік Стоваришыньом Жены Европы та другыма орґанізациями, при котрых асоциюют ся нацийональны та етнічны меншыны, жыючы на териториі міста. Велия традицийно пройде в просторах Рыцарской Академіі, в части, де находит ся Ліґницкій Центр Культуры. Початок стрічы о 17.00 год.

Головном ідейом стрічы являт ся вказаня народных традиций і звыків, котры товаришат в велийным періоді поєдным меншынам, котрых процентове чысло як іде о місто Ліґниця є доста высокє. Більшіст представників меншын то днешні потомны тых, котры трафили на Ліґниччыну в 40. роках ХХ ст. Нашли ся гын по своій воли, як і з причыны беззаконных рішынь зо стороны товдышньой комуністичной державы. Днес хотят ся ліпше познавати, інтеґрувати і вказувати вшытко, што є основом іх істнуваня – язык, культуру та історию.

За недільным столом полным велийных страв сядут м.ін. Ромы, Росияне, Украінці, Німці, Жыди, Грекы, Туркы, Полякы (ґаздове стрічы) та очывидно Лемкы. Нашу народніст будут репрезентувати представникы Стоваришыня Лемків вєдно з молодіжу Лемківского Ансамблю Пісні і Танця Кычера.

На прикрашеных столах все находят ся стравы, котры найліпше презентуют велийну традицю даной меншыны. На лемківскым столі напевно не бракне кєселиці, перогів, грибів, капусты, а і юхы – доброй на попитя. Стрічу отверат ґазда Ліґниці – за послідні рокы президент Тадеуш Кжаковскій, а дальше кажда з меншын коротко заберат голос, презентуючы себе і представляючы находяче ся на своім столі ідло. Присутны ділят ся оплатком, а в примірі вірных східніх Церков – дором. Дальше, вшыткы приступуют до святочной консумпциі, прібуючы єдны в другых стравы, котры найбарже характеристичны для поєдных меншын. Попри тым, кажда з ґруп выконує коляды в рідным языку. Влони, лемківска етнічна меншына не лем співала, але і при участи гудаків акомпаніювала інчым меншынам, котры выконували своі колядкы.

За тым мотузком можете пізрити на фотореляцию з влонишньой Велиі Народів.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар