Голосник

Міджінародна літня школа русиньского языка і културы – 7. річник

Пряшівска універзіта в Пряшові є єдинов універзітов у Словацькій републіці, котра реалізує навчаня акредітованого бакаларьского, маґістерьского і докторьского штудійного проґраму русиньскый язык і література, ґестором котрого є Інштітут русиньского языка і културы. Вдяка його 3-тыжденному едукачному проєкту Studium Carpato-Ruthenorum – Міджінародна літня школа русиньского языка і културы Пряшівска універзіта є сучасно єдинов універзітов на світі, котра зареаґовала на інтерес o таку форму навчаня русиньского языка з боку домашніх і загранічных адептів і в сучасности рихтує семый річник того міджінародного проєкту.

Міджінародна літня школа русиньского языка і културы є про: каждого, хто ся хоче учіти русиньскый язык і спознати історію і културу карпатьскых Русинів, штудентів середніх і высокых школ, особы над 18 років. Цільом проєкту є здобыти або росшырити языковы компетенції в русиньскім літературнім языку і проглубити знаня з области карпаторусиньской історії, културы, літературы, етноґрафії.

ПЕДАҐОҐІЧНЫЙ ПРОЦЕС

Педаґоґічный процес на літній школі проходить в просторах Пряшівской універзіты, ул. 17. новембра ч. 15. Навчаня ведуть высокошкольскы професоры, фундованы славісты і шпеціалісты в области карпаторусиністікы зо Словакії, Україны, США і Канады. Педаґоґічный процес творить інтензівный курз русиньского языка (уровни А, Б, Ц) і історії карпатьскых Русинів, котрый i на тім річнику буде росшыреный о історію русиньской літературы і културы і о мінікурз етноґрафії карпатьскых Русинів. В цілім педаґоґічный процес обсягує: 20 годин русиньской історії в анґліцькім і русиньскім языку (враховано історії русиньской літературы і културы), т. є. 2 годины каждый день, од 09.00 дo 11.00 год., 30 годин русиньского языка в анґліцькім і русиньскім языку, т. є. 2 годины каждый день, од 14.00 дo 16.00 год. (теорія і конверзація), 10 годин етноґрафії Русинів в анґліцькім і русиньскім языку, годины конверзації в неформалных просторах, ґрупах і сітуаціях, т. є. мімо універзітных клас. Абсолвенты здобудуть Цертіфікат о абсолвованю Studium Carpato-Ruthenorum 2016.

КУРЗ ІСТОРІЇ КАРПАТЬСКЫХ РУСИНІВ

Лекторы: Проф. Др. Павел Роберт Маґочій, Торонтьска універзіта, Канада, Мґр. Валерій Падяк, к. н., Научный центер карпатістікы в Ужгороді, Україна

Курз є заміряный на історію Карпатьской Руси і карпатьскых Русинів од найстаршых часів аж по сучасность. Буде росшыреный о лекції з історії русиньской літературы і културы.

КУРЗ РУСИНЬСКОГО ЯЗЫКА

Лекторы: Асіст. Проф. Др. Елена Будовская, Джорджтавньска штатна універзіта), Вошінґтон, D. С., США, ПгДр. Кветослава Копорова, ПгД., Пряшівска універзіта, Словакія, Мґр. Марек Ґай, екстерный сполупрацовник Інштітуту русиньского языка і културы Пряшівской універзіты, Словакія

Курз є заміряный на здобытя і росшыріня языковых компетенцій в русиньскім літературнім языку. Має теоретічну і практічну часть. Теоретічна часть є заміряна на здобытя знань з области сістемной штруктуры русиньского языка. Цільом практічной части є навчіти ся бісідовати по русиньскы і писати. Курз буде росшыреный о годины конверзації в неформалных просторах, ґрупах і сітуаціях, т. є. мімо універзітных клас.

МІНІКУРЗ РУСИНЬСКОЙ ЕТНОҐРАФІЇ

Лекторы: Асіст. Проф. Др. Елена Будовская, Джорджтавньска штатна універзіта), Вошінґтон, D. С., США, Проф. ПгДр. Микола Мушинка, др. н., екстерный сполупрацовник Інштітуту русиньского языка і културы Пряшівской універзіты, Словакія

Мінікурз є заміряный на дакотры области етноґрафії карпатьскых Русинів: народны співанкы, музику, звыкы, традіції…

СУПРОВОДНЫ АКЦІЇ

Інтеґралнов частьов літньой школы є супроводный проґрам, котрый ся реалізує все в пообідніх годинах і через вікенды. Є заміряный на: презентацію русиньскых традіцій, фолклору і културно-сполоченьского жывота Русинів на Словеньску (фолклорный фестівал у Свіднику і русиньскы културны інштітуції в Пряшові), презентацію русиньской народной архітектуры і културы, културно-історічных памяток (музеї, сканзены, деревяны храмы), вечур русиньской літературы споєный з передаваньом каждорічной Премії Александра Духновіча за літературу, выступліня театру і філмовы вечоры, творивы ділні (крашіня яєць, спів, танець), екскурзії по Пряшові і його околіці і до реґіонів северовыходной Словакії, де жыють Русины.

УКВАРТЕЛЬОВАНЯ І СТРАВОВАНЯ

Участници літньой школы будуть уквартельованы в штандардных двойпостільовых ізбах з припоїньом на інтернет высокошкольского інтернату на ул. 17. новембра ч. 11 в Пряшові, недалеко высокошкольского ареалу. Стравовати ся будуть в їдални высокошкольского інтернату на ул. 17. новембра ч. 13. Штуденты будуть мати к діспозіції сполочну інтернатну кухню з леднічков і прачков. Недалеко высокошкольского ареалу ся находять обходы з потравинами, дроґеріов, рештавранты, інтернетовы кавярні, книжковы обходы, кіоскы, апатыка, заставка автобуса.

ЦІНА І АДМІНІСТРАТІВНЫЙ ПОПЛАТОК

Ціна за 3-тыждньове перебываня на літній школі є становена на 1 200 €, респ. 1 310 USD. В ціні є загорнутый педаґоґічный процес, уквартельованя, стравованя (фрыштик, обід, вечеря), транспорт і выклад почас екскурзій, тікеты до музеїв, сканзенів, деревяных церьквей, театру, на фестівал. Повинностьов будучіх штудентів літньой школы є в становленім терміні заплатити адміністратівный поплаток (котрый ся не вертать) в сумі 100 €, респ. 110 USD. Транспорт на літню школу, т. є. дорогу до Пряшова і назад, каждый участник собі платить сам. Штуденты, котры планують абсолвовати цілый проґрам літньой школы, можуть пожадати од орґанізатора штіпендію.

ВАЖНЫ ТЕРМІНЫ

Приглашкы на Studium Carpato-Ruthenorum 2016 ся приймають он-лайн найпізніше до 1. апріля 2016 на адресі urjk@unipo.sk, респ. на поштовій адресі: Prešovská univerzita Ústav rusínskeho jazyka a kultúry, Ul. 17. novembra 15, 080 01 Prešov, Slovenská republika.

Адміністратівный поплаток (100 €, респ. 110 USD) треба заплатити найпізнiше до 15. апріля 2016. Решту становленой сумы (т. є. 1 100 €, респ. 1 200 USD) треба заплатити найпізнiше до 15. мая 2016.

ПОТРІБНЫ КОНТАКТЫ

Приглашку на Studium Carpato-Ruthenorum 2016 і комплетный проґрам найдете на http://www.unipo.sk/pracoviska/urjk/1/LS7; www.c-rs.org. Контактны особы про штудентів зо Словакії: Мґр. Тімеа Верешова, ПгД., тел. +421 915 412 917, і-мейл: vtimika@freemail.hu; Мґр. Аліца Вєтошевова, тел.: +421 (51) 756 31 89, +421 907 385 301, і-мейл: urjk@unipo.sk. Контактнa особa про загранічных штудентів: Асоц. Проф. Др. Патріція А. Крафчік, krafcikp@evergreen.edu.

Заплатити мож банковым шеком адресованым на: Prešovská univerzita v Prešove, p. Katarína Sabolová, Ul. 17. novembra 15, 080 01 Prešov, Slovenská republika або банковым трансфером: Назва рахунку (учту): Bežný účet Prešovská univerzita Prešov Чісло рахунку: 7000066503/8180, BIC – SWIFT: SUBA SKBX, IBAN: SK15 8180 0000 0070 0006 6503, Назва банкы: Štátna pokladnica Адреса банкы: Radlinského 32, 810 05 Bratislava 15, Варіабілный сімбол: 1780

Тiшыме ся на вас на Studium Carpato-Ruthenorum 2016 – 7. річнику Міджінародной літньой школы русиньского языка і културы на Пряшівскій універзіті в Пряшові.

Жрідло: ІРЯК ПУ

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі