Дванасти “Днї Габури”, хтори у Словацкей отримани 5. и 6 юлия того року под покровительством Фондациї “Древена церквочка” и места Габура, почали зоз одкриваньом вецей як пейц метери високого памятнїка з бронзи Князови Лаборцови, на брещку Вршок нєдалєко од Габури.
На тогорочних “Дньох Габури” участвовали и предсидатель Шветовей ради Русинох/ Руснацох/ Лемкох и предсидатель Рускей матки Дюра Папуґа зоз Руского Керестура, секретар Шветовей ради РРЛ Владимир Противняк зоз Медзилаборцох, нови предсидатель Русинскей оброди у Словацкей Милан Мнягоньчак зоз Гуменого, як и главни редактор “Бесиди”, глашнїка Лемкох у Польскей Петро Трохановски зоз Кринїци и редактор интернетового лемковского Радия “Лем ФМ” Боґдан Ґамбаль зоз Кракова. На тогорочних “Дньох Габури”, на поволанклу старосту Габури Микулаша Ющика участвовала и 6-члена делеґация Основней и штреднєй школи “Петро Кузмяк”, Рускей матки и Спортского дружтва “Русин” зоз Руского Керестура хтору предводзели професоре Янко Хома, Евґениє Медєши и Славко Пап, як и нсамбл Културно-уметнмїцкого дружтва “Тарас Шевченко” зоз Дюрдьова, а на програми наступела и Саня Полдруги зоз Нового Саду, зоз своїма шпиванками На културней програми у амфитеатре зоз назву “Я Русин бул, сом и будзем”, наступели вецей познати професийни и аматерски ансамбли, шпивацки ґрупи и оркестри, як цо то “Шаришан”, “Лучница”, “Кандрачовци”, а орґанизовани и окремни концерт за младих.
Други дзень фестивалу бул пошвецени 12. Мемориялу Владимира Онуфрака, та на стадионє отримани медзинародни турнир у фодбалє, а вечар на истим стадионє бул и концерт за младих Руснацох. “Днї Габури” витворени з помоцу потримовки Канцелариї Влади Словацкей Републики, з Програми Култура националних меншинох.
Сердечни поздрав, Дюра Папуґа.
(Статя была написана як віст до гласника (журналу) Руской Маткы в Сербіі „РУСНАК“ і прислана для лемківского радіа lem.fm)
ТЕКСТ НАПИСАНИЙ В БАЧВАНЬСКЫМ СТАНДАРДІ РУСИНЬСКОГО ЯЗЫКА
Коментарі