Голосник

На весіля до Незнайовы ― з Емілийом Нестеряк #3 – проґрам «70 процент» – понедільок, 20.00 год.

Гостте же ся, гостте, // моі любы гості. // Так ся тішу вами // Яко тисячами!

Так співат мі Емілия Ятчышын (з дому Нестеряк), котра гостит ня в своім домі в Калушы. Частує ня щедро тіж співанками: знат іх барз дуже. Пєме гарбату і порівнюєме, чым колиси ся ріжнило весіля в Незнайові і Розділю… Але як може памятати тото?! Пані Міля выіхала з рідного села дванадцетлітнім дівчатком, а діти на весіля николи не брали! А єй мама, што часто сващыла, даколи позволяла цікавій своій дівочці зазріти досередины… Окрем того, по каждым весілю переповідала і переспівувала вшытко трьом своім дівкам. Так оно і лишыло ся в памяти, бо в Калушы такых весіль уж не было.

То… просиме до нас на весіля! Буде і весело, і смутно, і серьозно, і смішно. І ансамбль «Студенка» приде тіж. Видите го на знимці? А пані Мілю познали сте? Є, тота, што стоіт напереді, в чорным ґорсеті з жолтыма квітками…

Шеруй.

О авторі

Avatar

Вродила ся в 1970 році во Львові. І уж неодолга писала, малювала, но і витинала преріжны річы з паперя. І робит тото доднес, але тепер уж в Івано-Франківску. До Лем.ФМ трафила припадково. До того часу робила з дітми, вчыла іх журналистыкы і малюваня. Барз любит люди, якых презентує слухачам в проґрамі «70%». Грызе ся, же єдного дня правдивы Лемкы можут ся скінчыти. Зато, жебы зімати диктафоном вшыткых, глядат когоси доброго і щырого до помочы… Як хочете дашто повісти, то пиште: anna_kyrpan@bigmir.net

Коментарі