Голосник

Набір до Терочкы

Ансамбль Пісні і Танця «Терочка», діючый при Рускій Бурсі в Ґорлицях, оголосил набір. Глядают осіб до співаня, гуланя аж і граня в капели.

В вікенд 21.-22. вересня/септембра тр. в Рускій Бурсі пройде отверта пробра ансамблю, на котру може прити каждый, хто лем любит співати, танцувати або знат грати на дакым інструменті. Каждый буде міг найти місце для ся. На пробі буде ведена наука нового танця і новых співанок.

На репертуар Терочкы складают ся народны лемківскы співанкы в аристичных обробках Андрия Трохановского, заєдно кєрівника ансамблю. Фольклор і фольк од все были близкы Лемкам, зато і більшіст нашых ансамблів выконує народны співанкы. Терочка выріжнят ся тым, што, окрем знаных пісні, популяризує авторску русиньску творчіст, котрій кумшту додают нешабльоновы аранжациі кєрівника ансамблю – Трохановского. Успішні продолжат він родинну традицию. Няньо, Петро Трохановскій, чловек оркєстра, серед нескінченого списку професий має писаня поезиі і выдумуваня мелодий до своіх і інчых вершів. Стрыко, Ярослав Трохановскій, называный членами цілой лемківской соспільности Меастром, долголітній ведучый заслуженого ансамблю Лемковина, дотепер компонує і обраблят на хор і оркєстру народны лемківскы співанкы.

Пару ґенераций Лемків мало нагоду выховати ся на піснях Трохановскых, та і наймолодша має подібну можніст. Членство в ансамбли дозвалят переконати ся, як спілдіяти в ґрупі, як выглядат рыхтуваня ся до концертів. То спосіб на орґанізуваня часу поза школом, студиями, спосіб на познаваня новых люди, а при нагоді выступів – познаваня світа. То тіж передовшыткым постійный контакт з лемківскым языком і культуром.

Терочка має на своім конті уж парудесят выступів, головні в Польщы, але і на Словациі, Украіні, Хорвациі ци Сербіі.

Заінтересуваны прилучыньом до ансамблю прошены сут о контакт з кєрівником Терочкы – Андрийом Трохановскым, тел. 508687123, ґамбокнижка @andryjtrochanowski, або з членами ансамблю.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі