Голосник

„Найвірнішый народ“ припомяне собі Ференція Ракоція ІІ.

0
Місто Шарошпоток, Вседержавноє Русинськоє Самосправованя, і Шарошпотоцькоє Русинськоє Самосправованя і тот рік у Шарошпотоці орґанізують подію із нагоды річніці народжіня Ференція Ракоція ІІ. Русины стрітять ся під мурами замку того владаря, де є його скулптура.

Торжественна подія тот рік одбуде ся 23-го марца і проґрам зачне Святов літурґійов в Ґрекокатолицькій церькви свв. Петра і Павла, котру буде служыти отець Янош Мігаль Соноцькый.

На події і депутат парламенту

Як інформує сайт русиньской самосправы в Мадярьску, в рамках події ся участным приговорять Ріхард Гйорчік – депутат мадярьского парламенту; Віра Ґіріц, котра є представительков Русинів у парламенті; Др. Янош Ковач – головный правник области Боршод-Абов-Землін; пріматор (мер) Шарошпотока Янош Арош і Др. Едіт Тамаш – директорка Музею Ференца Ракоція ІІ., котрый є частьов Мадярьского націоналного музею. Остатнім выступаючім буде Др. габ. Шандор Енґі із Реформатьской теолоґічной академії.

На події будудть выступати школярі Основной школы імени Ференца Ракоція ІІ. і Основной умелецькой школы у Шарошпотоці. Про участників є приготовлене аґапе, по проґрамі помсотрять собі обновленый реформатьскый храм.

Найвірнішый народ

Русины в Мадярьску честують память Ференція Ракоція ІІ, котрый народив ся 27-го марца 1676-го року в Борші – селі, котре днесь находить ся на теріторії Словакії. В Мадярьску быв у 2015-ім році день народжіня той вызначной історічной особности парламентом выголошеный за памятный день.

Ракоцій назвав Русинів „gens fidelissima“ (найвірнішый народ). Тото названя собі выслужыли за свою вірность, кедь в рр. 1703 – 1711 по боці Ракоція войовали в неуспішнім бунті проти Габсбурґів. Ракоцій быв у тім часі князьом Трансілванії і паном Мукачівского замку.

Із Ракоційом є повязане і святкованя Дня Русинів в Мадярьску, котрый є встановленый на 22-ый май. Як раз 22-го мая 1703-го року Томаш Есе в Береґсасі підняв заставу і залучів підкарпатьскых Русинів до освободженецькой войны Ференца Ракоція ІІ.

Жрідло фотоґрафії: Köztérkép.hu.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар