Голосник

Не лем для тіла, тіж і для духа

Як сме скорше інформували, в Радваницях при мериторичній підтримці учытелькы лемківского языка, Дороты Максимчак, і підпорі директоркы Основной Школы в Радваницях, Боґуславы Німаш, основана была неформальна лемківска ґрупа, котра в рамках проєкту «Тот світ не загынул – зовут іх Лемками» фінансуваного з Малого Ґранту Нижнього Шлеска підняла ся діяти на хосен Лемків і лемківской культуры та языка на обшыри Нижнього Шлеска.

В склад ґрупы входят головні діти, якы вчат ся лемківского языка, і іх родиче. В плянах колективу было іхати на прогульку по Нижнім Шлеску, зрыхтувати лемківскій родинный фестин для Лемків з цілого Нижнього Шлеска і брати участ в подіях інчых локальных, не лем лемківскых орґанізаций, де могли бы свідчыти о тым, што Лемкы были, сут і будут.

За інформациями, котры были нам переданы, Дорота Максимчак і діточкы разом з родичами здоляли уж зреалізувати більшу част задач, якых ся підняли.

Як певно неєден знає, коли Лемкы дашто рыхтуют, то все думают о тым, штобы было кус для тіла і кус для духа, на весело і на поважні. Так было і тым разом, орґанізаторы прогулькы дотримали вшытки тоты принципы.

Ґрупа, згідно з пляном, была на дводньовій прогульці, од 8. до 9. червця/юнія 2019 р. Першого дня беручы участ в акциі вандрували гористыма шляками Карконошского Нацийонального Парку, звиджали Замок Хойник, а вечером інтеґрували ся при огниску зорґанізуваным при Православным Домі Опікы св. Штефана в Теплицях. Весідували о мриях і реалиях лемківской культуры і плянах розвитку. На другій ден, в неділю, як пристало на честных Лемків і християн, вшыткы задбали тіж і о духову сферу і пішли на службу божу до Церкви Святых Апостолів Петра і Павла в Єленій Горі. Прогулька по Нижнім Шлеску закінчыла ся забавом в Теплицкых Термах.

Лемківскій Родинный Фестин згідно з пляном был реалізуваный 15. червця/юнія 2019 р. і проходил завдякы підпорі пароха церкви в Бучыні, о. Юрия Омелянюка, на пляцу при Православній Церкви св. Димитрия Солуньского в Бучыні. Подію прикрасил свойом присутністю і добрым словом війт ґміны Радваниці – Павел Півко.
Подія зачала ся од танця з хустами, якій запрезентували дівчатка з клясы лемківского языка. Пред дальшым выступом голос забрала Боґуслава Німаш – директорка основной школы, котра привитала присутных і оповіла о проєкті. По словах вступу діти были готовы, жебы вказати інсценізацию, котра выкликала слезы серед обзереючых. Люде были порушены тым, як наймолодшы запрезенували траґічну подорож своіх прадідів в незнане. По інсценізациі парох закликал вшыткых на короткій молебен при памятнику споминаючым выгнаных вчас акциі «Вісла» і замученых в лаґрі в Явожні. На пляцу была тіж выстава дітячых малюнків, якы были рыхтуваны наймолодшыма через цілый шкільный рік.

Дальша реляция в знимках і словами тых, якы брали участ в подіі. Обізрийте фотоґрафіі і послухайте, што ся діяло на сцені і як коментували тото присутны.

Цілу авдийореляцию слухайте за мотузком.

Знимкы з Лемківского Родинного Фестину в Бучыні: 

Знимкы з прогулькы по Нижнім Шлеску:

Шеруй.

О авторі

Мирко Воргач

Хоц то моі реляциі нагрываны сут на Заході, то слуxай мя в радию Руской Бурсы на частотах: 106.6 МГз в Ґорлицяx, 103.8 МГз в Польковицяx i в цілым світі онляйн на www.lem.fm   ;    Контакт: mirek@lem.fm

Коментарі