Голосник

Никыфор, креницкій символ – пропамятний концерт в 50. річницю смерти артисты (ретрансмісия) – середа 20.00 год.

0
В чест Никыфора, русиньского маляря, в 50. річницю  його смерти Окружний Музей в Новым Санчы, довєдна з самоурядами малопольского воєводства і міста Крениця, при підпорі м.ін. лемківскых соспільных стоваришынь, в шыковній сали Здройового Дому зорґанізували вечер памяти артисты.

Річниця смерти Никыфора была імпульсом до придуманя Сандецкым Окружным Музейом циклю ріжного рода культурных імпрез, з котрых найважнійшом єст велика выстава плястичных творів артисты. Головным орґанізатором вшыткых подій был кустош музею, найвызначнійший знавця никыфоровой творчости – Збіґнєв Волянін. Вступне слово до чысленні зобраных на подіі выголосил др Дариюш Ресько, бургомайстер Крениці.

«Никыфор маляр – Никыфор артиста» то назва выставы, котру Музей Никыфора в Креници орґанізує з нагоды 50. річниці смерти Епіфана Дровняка. Вернісаж пройде 23. червця/юнія 2018 р. о 12.00 год.

Окрем інчых імпрез одбыли ся – слідуюча едиция роверового райду путьом Никыфора і Юрия Гарасимовича та споминова проєкция славного фільму в реж. Кшыштофа Краузе пн. Мій Никыфор.

В рамках подій, присвяченых 50. річници смерти Никыфора, в середу, 11. липця/юлия 2018 р., о 19.00 год. в Креници проходила стріча з авторамі фабулярного фільму «Мій Никыфор». Перед стрічом фільм был выемітуваний в концертовій сали креницкой Головной Пияльні.

Завершыньом подій присвяченых жытю і творчости Епифана Дровняка была стріча і концерт, в котрым выступили м.ін. молодіжний хор Роса з Устя Ґорлицкого (Руского), молодіж і учытелі з ліцею в Мушыні, Юлия Дошна і Петро Мурянка. Были деклямуваны вершы польскых і русиньскых поетів присвяченых Никыфорови.

Серед інчых на особливу увагу заслугує верш Павла Стефановского пн. Никыфор, котрий повіла Юлия Дошна

Просиме слухати ретранцимісию креницкого концерту, якій прошол 9. жолтня/октобра 2018 р. в 50. річницю смери артисты.

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар