Голосник

Новорічна стріча в президента

В віторок, 14. січня/януара 2020 р., президент Польской Республикы Анджей Дуда гостил представників ріжных конфесий та нацийональных і етнічных меншын, котры сут вызнаны польскым законодавством.

Тота циклична подія была продолжыньом доброй традициі новорічных стріч президента, котрый зазначыл, што в Польщы через столітя жыли люде вельох нацийональности, віроісповідань і культур.

Єрархы і світскы представникы

Серед запрошеных на стрічу были єрархы ріжных костелів і звязків, котры практикуют на обшыри державы, м.ін. владыкы Римокатолицкого Костела, представникы жыдівской і мусульманьской спільнот, єрархы соєднаны в Польскій Екуменічній Раді. До Польской Екуменічной Рады приналежыт м.ін. Польска Автокефальна Православна Церков, котра на стрічы репрезентувана была делеґацийом на челі з митрополитом варшавскым і цілой Польщы Савом. Грекокатолицку, перемышльско-варшавску архієпархію Украіньской Грекокатолицкой Церкви, репрезентувал архієпископ Євген Попович.

Участ в стрічы взяли і представникы нацийональных і етнічных меншын, котры засідают в Спільній Комісиі Уряду і Нацийональных і Етнічных Меншын. Витано вшыткы меншыны, в тым лемківску. Выступил Григорий Куприянович, репрезентант украіньской меншыны і спілведучый СKУіНіЕМ, котрый бесідувал про малый ювілей, 15-літя схваліня закону про нацийональны і етнічны меншыны і реґіональный язык.

Спільнота сучасной Польщы

В своім выступліню президент Дуда подякувал, што уж пятый раз в його каденциі може стрічати ся з представниками конфесий і нацийональных меншын. «Стріча, котра має для ня вынятковый вымір. Припоминат тіж о історичній спадковині і історичным вымірі нашой вітчызны, Польщы – о тым, же протягом століть жыли ту люде вельох нацийональности, вельох віроісповідань, вельох культур», бесідувал.

Дальше президент споминал на спільноту сучасной Польщы, до котрой належат не лем Полякы, але і поєдны меншыны, котры через столітя вносили вельо в розвиток державы.

А. Дуда повіл, што для него Поляком єст каждый, хто чує ся звязаный серцьом з польском земльом, незалежно ци єст з походжыня Білорусом, Украінцьом, Жыдом, ци належыт до інчой меншыны. «Кєд чує ся звязаный з том земльом, кєд бесідує – «Тота польска земля єст мойом вітчызном» – то для мене в того слова значыню єст Поляком», пояснял президент.

Дальше навязувал до історичных дій, котры мали великє значыня для Польщы. «Думам, же так думали тіж тоты, до котрых барз часто вертам, коли бесідую о тых справах – тоты, котры боронили Польщы перед совітскым атаком в 1920 році, тоты, котры потім боронили перед німецком і совітском аґресийом в 1939 році і з оружом в руках гынули за Польщу через вшыткы тоты рокы. Они вшыткы – думам – гынули зато, же уважали ся сынами той землі, значыт – в моім розумліню того слова – Поляками. І напевно называм іх і хочу іх называти своіма родаками», бесідувал А. Дуда.

Выступували і інчы прелеґенты, котры так само вінчували з Новым Роком. Полный текст президентского выступліня доступный єст на сайті www.prezydent.pl.

фот. www.prezydent.pl / Grzegorz Jakubowski / KPRP

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі