Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – музею, театру і ансамблю Пульс.
В Книжници.фм бібліотекар Ігор Латта буде чытал драматичный текст авторства Андрия Копчы пн. «Одтяте коріня».
Целебритом того тыжня буде першый професийный музичный діяч на Підкарпатскій Руси – Константин Матезоньскій. Хоц правдиве його назвиско єст незнане, то знаме рік його народжыня – 1704 р., і тото, што был він еміґрантом з Росиі. Пришол до Ужгорода в 1833 р. з Перемышля. Ту основал першый штырьоголосовый хор Гармонія, якій істнувал близко 100 років. Матезоньскій якісый час жыл в Мукачеві в поеты і священника Василя Долговича. Осіню 1834 рока русиньска єпархія приняла го на функцию дириґента церковного хору.
Петро Медвід в Перличках прочытат пару статий, котры были надрукуваны в підкарпатскій ґазеті «Карпатска Неділя» в жолтни/октобрі 1940 р. Буде про незаконне переходжыня границі і повязаный з ним проблем дезерциі, про змаганя в збераню зіля і лікуючых рослин. Реґентскій комісар Миколай Козма в товаристві докторя Юлия Марины, міністерияльного совітника ведучого культурового одділіня, зробили велику окружну дорогы до шкіл на Підкарпатю.
В Припоминці Теодозія Латтова буде рецензувала книжку проф. Михала Капраля «Шкільна хроніка Чынадієва 1923-1937». Чынадієво то велич село при Сваляві на Підкарпатскій Руси. По великій войні зачала ся русиньска школа в селі. До той школы записало ся 175 діти. В 1929 р. до школы пришол ґубернатор Антоний Бескід, а в 1934 р. пришло радийо. Коли возникло в Кошыцях державне русиньскє радийо, так пришол до школы директор той редакциі Андрий Рудловчак. Была награна і высылана радийова передача з лекцийом русиньского языка.
фото горі – замок в Чынадієві, wikimedia
Коментарі